Matt Damon channa aiin Lego Batman bawk a lian
Kar tawp chhung khan North America-ah chuan Matt Damon-a channa, The Great Wall aiin animated movie, The Lego Batman Movie zawk a la hlawhtling. The Lego Batman Movie hian kar tawp chhung khan USD mtd 34.2 lai, North America aṭangin a lalut leh. Matt Damon channa hi Fifty Shades Darker hnuaiah a la awm bawk.
Fifty Shades Darker pawh hi a hma aia a invawrh san leh an beisei viau a, mahse eng ruai a ang thei lo. Matt Damon channa, The Great Wall pawh a chhuak thar a ni nachungin The Lego Batman Movie hnuaiah a awm. The Lego Batman Movie hi chhungkuaa movie enten an en nasat a ni. USD mtd 98 zet a thakw chhuak tawh.
Fifty Shades Darker chuan USD mtd 21 lalutin pahnihnaah bawk a awm leh a, hengte nena North America aṭanga a sum hmuh zawng zawng chu USD mtd 89 a tling ta. Kar hmasa leh lam khan pahnihna a ni a, pahnihnaah bawk a ṭhu leh.
Matt Damon channa, The Great Wall chu beisei a sang viau nain, beisei a pha tawk lo. Kar tawp chhung khan USD mtd 18.1 a lalut a, pathumnaah bul a ṭan. Hei bak hi chu san lamah a thleng tawh lo mai thei. Keanu Reeves channa, John Wick: Chapter 2 chu pathumna aṭangin palinaah a chhuk.
US Box Office movie
“The Lego Batman Movie” - $mtd 34.2
“Fifty Shades Darker” - $mtd 21
“The Great Wall” - $mtd 18.1
“John Wick: Chapter 2” - $mtd 16.5
“Fist Fight” - $mtd 12
“Hidden Figures” - $mtd 7.1
“Split” - $mtd 7
“A Dog’s Purpose” - $mtd 5.6
“La La Land” - $mtd 4.5
“A Cure for Wellness” - $mtd 4.2