Dakota Johnson
Fifty Shades of Grey-ah hlawhtlin namenin a hlawhtling lo a, chutah Fifty Shades Darker pawh a rawn hlawhtling leh bawk. He film-a a changtunu Dakota Johnson hi movie lamah hlawhtling loin, lemchan hi thiam ta lo se thilmak a ni hial zawk ang.
A pian leh murna aṭangin Dakota Johnson hi movie nen a inkaihhnawih nghal tlat. A nu hi Melanie Griffith a ni a, Oscar dawng thei khawpa lemchan thiam a ni a, a pa pawh Don Johnson a ni. A pa tak leh a nu an inṭhen hnua a nu pasal ni zui tate pawh hi lemchan khawvelah chuan an neu lo - Antonio Banderas te, Steven Bauer te an ni. A pi, Tippi Hendren pawh Hollywood-a mi hlawhtling zinga mi tho a ni.
Movie lama a lanna hmasa chu a pa hrawn, Antonio Banderas-a film, kum 1999-a mi Crazy in Alabama kha a ni. Hemi hnua a film chan leh hmasa ber, hlawhtling zet mai chu kum 2010-a mi, Justin Timberlake nena an channa, The Social Network kha a ni a, heta ṭang hian movie khawvelah kan hmu chho ta mawlh mawlh a ni.
Hetianga actress hlawhtling lo ni chho ta Dakota Johnson hi kum 1989 October 4 khan Austin, Texas-ah a piang a, a hming tak chu Dakota Mayi Johnson a ni. A naupanlai aṭangin film channa chhehvelah a chetla hnem hle. “Ka naupanlai hun tam zawk kha chu film an channa hmunah ka hmang niin ka inhria. Film siamtute leh heng mite kaihhnawih velin min hual reng a ni ber,” a ti. A nu leh pa hi film star an nih avangin school pawh a kal ṭha lo a, a nu leh pain film an channa hmun apiangah an hruai ṭhin avangin tutor an laksak mai ṭhin.
Ruihtheih thil lamah chuan an chhungkua hi an entawntlak loh hle. A nu leh pate hi ngawl chi hrang hrang vei an ni a, rehab-ah an awm fo a, chumi kawng lam chu Dakota hian rawn zawh vein, zu leh damdawi ngaih avangin kum 17 mi chauh a nihin rehab-ah a lut tawh. Hetiang hi ni mah se, kum 2006 khan Miss Golden Globe-a thlan a ni a, a nu pawh kum 1975 khan thlan a lo ni tawh a, nufaa Miss Golden Globe-a thlan awm chhun an ni. A châk ber ṭhin chu chhungkaw pangngai, photographer leh chanchinbu mitena an zim luai luai ni lo chhungkua a ni.