Katy Perry A hlawhtlinna a ropui

Hlawhtling ber tia chhâl theih chu ni lo mah se, music khawvela Katy Perry hlawhtlinna hi a ropui lo tih rual a ni lo. Billboard Hot 100-a lang thei hla tam tak a nei a, Billboard 200-a lang thei album a nei chho mawlh mawlh bawk.

Tunhnaia a hla tihchhuah thar ‘Chained to the Rhythm’ pawh a rawn hlawhtling nghal hle a, heti tak hian rawn hlawhtling mah se, a hla hmasate hlawhtlinna a rawn pha lo mai thei a nia.

Snopp Dogg nena an sak dun ‘California Gurls’ hla ringawt kha, a hla mal chauhin maktaduai 5.8 zet a hralh a nia. Kha kha a hla hralh hnem ber a ni lo, hla mala a hralh hnem ber chu Firework niin, maktaduai 7.1 a hralh. Roar hla kha maktaduai 6.4 a hralh a, Dark Horse kha maktaduai 6.3 a hralh a, E.T kha maktaduai 5.9 a hralh.

Khingte bakah khian maktaduai thum chuang a hralh tlin hla hi ‘Hot N Cold’, ‘Teenage Dream’, ‘I Kissed a Girl’, ‘Last Friday Night (T.G.I.F.)' leh ‘Wide Awake’ tih hlate a ni. ‘Part of Me’, ‘The One That Got Away’, ‘Waking Up in Vegas’, ‘Unconditionally’ leh ‘Thinking of You’ te kha maktaduai chung lam a hralh dangte an ni.

Album lamah pawh a hlawhtling. Kum 2010-a a tihchhuah ‘Teenage Dream’ kha copy makta­duai thum zet a hralh a, kum 2008-a a tihchhuah ‘One of the Boys’ kha copy maktaduai 1.71 a hralh a, kum 2013-a mi ‘Prism’ kha copy makta­duai 1.7 a hralh bawk. Katy Perry-i’n album a hralh tawh zawng zawng hi copy maktaduai 6.5 a ni a, digital track hi maktaduai 70 zet a hralh tawh.