Coachella-ah Beyonce a che dawn lo ; A aiawh turah sawi a tam viau rih

Hman ni lawkah nau a pai tih khawvel hriatah a tlangzarh a, hemi kal zel avang hian Beyonce chuan Coachella festival-ah a che thei dawn lo tih a puang. A aiawh turah tu nge ni ang tih chu chanchinbu hrang hrangin an inrinsiak a, a aiawh an awm kher pawh a ngai lo mai thei.

Beyonce Knowles hi headliner tur a ni a, Coachella festival hi April thla khian California-a Indio-ah neih a ni ang. Nau a pai tak avang leh, a nau pai a hram tak deuh avangin Beyonce hian Coachella-ah hian a inlan thei dawn lo tih a sawi. Kuminah ṭhulh mah se, nakkuma he festival neih leh turah a zai tho dawn nia sawi a ni.

Beyonce-i a thei dawn ta lo tih sawi a nih ve leh, Lady Gaga fan te lam an rawn che nasa a, a aiawh turin Gaga hmang ngei se an duh. Lady Gaga fan kher lo pawhin Gaga hi headliner ni thei se an duh hlawm tho a, Super Bowl-a a chet ropuizia te, Grammy-ah Metallica nena an chet pui dante an sawi chhuak. Hetihlai hian Hollywood Life chuan Beyonce aiah hian Taylor Swift hmang se tiin rawtna an lo siam ve mek bawk.