Tuipui mawng hmun ngaa ṭhena hmun khat dawn map an siam tawh

Mithiamte chuan tuipui mawng (ocean floor) pumpui map siam an tum a, tunah hian hmun ngaa ṭhena hmun khat dawn map chu an siam zo der tawh.

Kum 2017 khan tuipui mawng awm dan zirchiang tur leh survey tur hian Nippon Foundation-GEBCO Seabed 2030 Project chu tlangzarh a ni a, khatih hunlai khan tuipui mawng map hi modern standard-ah 6% chiah a la awm a, nikum khan 15% zo tawhin kuminah chuan 19% an zo tawh a ni.

Kum 2030-ah chuan tuipui mawng map hi siam zawh hman an tum a, hemi atan hian Seabed 2030 chuan nasa takin hma an la mek a, international organisation 100 vel laiin an support-na hnuaiah hna hi an thawk a ni. Sum leh pai thawhtu leh thlawptu pawl 133 lai an awm a, data lakkhawmna kawngah leh technical innovation lamah pawh thawhpui thar an neih belh zel bawk.

Kum 2019 chhung khan GEBCO grid-ah bathymetric (depth) data thar sq.km 14.5 lai an belh tawh a, hei hi Australia let hnih dawna zau a ni a, mahse pawm tlak map nei tur erawh chuan zirchian tur an la ngah hle.

Project director Jamie McMichael-Phillips chuan,"Tunah hi chuan 19% level-ah kan awm mek. Chumi awmzia 81% zirchian tur kan la nei, map-a dah tur kan la ngah hle. Kum 10 lo awm tur chhung hian Sikeisen let hnih deuh thawa zau kan la tuamhlawm a ngai," a ti.