Rinlawk ‘La La Land’ a ropui

89th Academy Awards, Oscars tia sawi ṭhin chu sem a ni ta a, mi tam tak leh critics te beisei lawk La La Land a ropui. He film avang leh, a chan thiam em avangin Emma Stone chuan Best Actress a la.

Pathianni zana sem, Oscar Awards hi Hollywood-a Dolby Theatre-ah sem a ni a, Jimmy Kimmel chuan a host. Movie malah La La Land chuan award a dawng hnem ber a, he film-a a changtunu, Emma Stone-i’n Best Actress a dawn bakah hian La La Land hian award dang panga a hawn bawk.

Mualpho thlak deuh thil thleng a awm. Best Picture dawngtu tur chu presenter, Faye Dunaway leh Warren Beatty te chuan an puang sual. Faye Dunaway leh Beatty te hian Best Picture dawngtu tur chu ‘La La Land’ tiin an puang a, he film siamtute pawh stage-ah chhoin, award an dawn avanga an lawmzia te an sawi chiam hnuah an puang sual tih an hre chhuak a, award dawngtu zawk chu ‘Moonlight’ a ni tih an puang leh.

Award show host, Kimmel-a’n Donald Trump a kap nasa hle. Bul a ṭan phat aṭangin Trump kahna lam hawi a chhak chhuak nghal a ni ber mai. Academy Awards sem lai chu khawvel pumah an en tih sawiin, ‘ram 225 chuangah, tuna min haw tawhtute’ a ti kher. Chu bakah chuan, “President Trump hnenah ka lawm e tih ka duh,” tiin a sawi a, “Nikum kha chuan Oscars hi a racist tiin an sawi kha in la hre reng em?...tunah chuan khang kha a bo ta, a chungah ka lawm hle” a ti. Hei bakah hian Trump-a’n Meryl Streep chu a nihna bak aia ṭhain an sawi mai mai anga a sawite Kimmel hian a rawn sawi chhuak leh a, Meryl Streep hi stan­ding ovation pek a ni nghe nghe.

Midang pawhin politics rawngkai thil an sawi nual hlawm. Make-up artist Alessandro Bertolazzi chuan a award dawn chu pêm lût zawng zawngte tana a hlan thu a sawi. Ani bakah Best Picture lawmman sem a, puangtu Warren Beatty chuan, “Art-a kan tum leh politics-a kan tum hi thuhmun a ni a, chu chu thutak phawrh chhuah a ni,” tiin, art chuan, “Kan khawtlanga mi kan inchawhpawlh tawh hle tih a lantir a, chu bakah chuan chi hran chênho chu a pawm a, khawvel puma zalenna pawh a lantir bawk a ni,” a ti. Mexican actor Gael Garcia Bernal te, Iranian director Asghar Farhadi (Donald Trump-a dan siam thar duh loh avanga kal ve ta lo), Rich Moore te, Barry Jenkins te pawhin politic kaihhnawih an sawi bawk.

Justin Timberlake-a zai te, Kimmel-a’n theatre chhunga tour bus-a mi movie fan a luhtir vel chanchin a tam a, a hmuhnawm. Tour bus-a mi fan, theatre-a a luhtir zinga nupa tuak, Chicago-a mite ngaihsan Denzel Wa­shington chu a ko chhuak a, Denzel hian inneihtirna thuchham a han chham. Jennifer Aniston leh Justin Theroux te chu inneih present pe turin Kimmel hian a ti a, Jennifer hian a shade a pek tak kha. Ryan Gosling pawn Chicago aṭanga kal chu eng emaw ni a pe.

Winner List
Best Picture: “Moonlight”
Actor: Casey Affleck, “Manchester by the Sea”
Actress: Emma Stone, “La La Land”
Supporting Actor: Mahershala Ali, “Moonlight”
Supporting Actress: Viola Davis, “Fences”
Animated Feature: “Zootopia”
Cinematography: “La La Land”
Costume Design: “Fantastic Beasts and Where to Find Them”
Direction: Damien Chazelle, “La La Land”
Documentary Feature: “O.J.: Made in America”
Documentary Short: “The White Helmets”
Film Editing: “Hacksaw Ridge”
Foreign Language Film: “The Salesman”
Makeup and Hairstyling: “Suicide Squad”
Best Score: “La La Land”
Song: “City of Stars” from “La La Land”
Music by Justin Hurwitz; Lyrics by Benj Pasek and Justin Paul
Production Design: “La La Land”
Animated Short: “Piper”
Live Action Short: “Sing”
Sound Editing: “Arrival”
Sound Mixing: “Hacksaw Ridge”
Visual Effects: “The Jungle Book”
Adapted Screenplay: “Moonlight”
Original Screenplay: “Manchester by the Sea”