Pentecost Fak Zai ; A thiam ber a hriat dawn ta!

Pentecost Fak Zai Grand Finale chu zanin dar 8:00 hian neih a ni dawn ta - zaithiam tam tak kara thlanchhuah pangate an inel dawn a, a vawi khat nana neih Pentecost Fak Zai-a thiam ber nih an inchuh dawn.

Fak Zai inelna hi April thla tawp lam aṭang khan neih ṭan a ni tawh a, online-a audition round hmanga bul ṭan a nih hnuah top 20, top 10-ah te inelna kalpui a ni a, tunah chuan a sang zual panga aṭangin a thiam ber thlan a ni dawn.

Dawrpui Multipurpose Centre-a neih tur Grand Finale-ah hian zaithiam pangate hi hla pahnih ṭheuh sain an inel dawn a, live music leh track music hmanga inelna hi neih tur a ni dawn a ni.

Fak Zai Grand Finale-ah hian inelnaa telte chauh an inlan dawn lo - Mizo hla ropui, "Khawpui Mawi" tih phuaha lo larpui tawhtu Rodingliana, Tui nung lui hla hmanga Zoram mipuite lo awi tawhtu K. Vanlalhnema leh zaithiam chuai thei lo Ngurthangvela te an inlan dawn a, mit leh beng a tlai dawn.

Pentecost Fak Zai hi Mizoram UPC kohhran huang chhunga zaithiamte inelna a ni a, General PYD Literature Committee leh Literature & Publication Board-in an buatsaih a ni - Grand Finale hi Zonet Zawlbuk leh Zonet YouTube channel-ah en theiha pekchhuah tur a ni ang.

Mi panga thlanchhuahte hi Mizoram mipui min awi thei tur khawpa zaithiam an ni tawh a, Grand Finale en a manhla khawp ang. Rev. Dr. Ngurthanpara Sailo Chief Judge, Pentecost Fak Zai

A hmawr kan bawk dawn ta reng a, a lunglenthlak. Zaithiam ka ti em em vek a, a bik takin zanina inlan tur mi panga hi chu Mizo mipuite pawhin an ngaihven zui ngei ang tih ka ring - an thiam tlat! Ramherliani Judge, Pentecost Fak Zai

Live music nena kan zaithiamte che tla tur en ka châk tawh a, an zaithiam hlawm em avangin thutlukna siam a awlsam lo ang. Upa F. Vanlalchama Judge, Pentecost Fak Zai