Siampuii Ralte hla thar ‘Lenglerh’ chu... hei le!

Nikum kum tawp lamah Ṭhazual leh Lelte award a dawng a, kuminah erawh zirna avangin a reh zui vang vang a, tunah erawh hla thar nen a lo kir e. 'Lunglawm Tikimtu' hitmaker Siampuii Ralte hla thar 'Lenglerh' chu zanin hian a YouTube channel lamah thlira ngaihthlak theihin chhawp chhuah a ni dawn.

'Lenglerh' hi Nilaini zan lamah khan Zonet-ah chuan tihchhuah a ni tawh a, zanin aṭang erawh chuan duh hun huna hmeh chhuah theih a ni tawh dawn. Kumina Siampuii music video hmasa ber a ni a, a reh rei tawh deuh bawk a, music video mit titlai tur tak nen a rawn kir leh a ni.

'Lenglerh' music video hi a video dangah pawh a thawhpui tawh ṭhin Anthony WoWv kut chhuak bawk a ni leh a, screenwriting pawh a khawih tel vek a ni. Remruata BilyWaif direct niin storyboard writer atan Tommy Rosangliana, GRTV hman a ni a, Stunt Coordinator chu TS Cinematics a ni thung. Music video awmze nei tak, hmuhnawm tak a ni. Siampuii'n a hla a sa nalh viau bawk a, mit leh beng titlai tak MV niin Siampuii zai ngainatute tan chuan a ngaihven chi hle ang.

He hla hi kum 2014-a Casey's Secrets Band guitarist Asanga leh vocalist Frankie-te'n chawpchilh taka Mizo Idol contestant pakhat sak tura an phuah a ni a, hetih lai hian chang khat leh thunawn chiah ala awm. A kum lehah band tan tiin Asanga hian chang hnihna a phuah zawm a, band hla atan an buatsaih mek laiin band an active zui thei ta si lo a, eng emaw chen sak loha a awm hnu ah music style tlem a her danglam hretin Siampuii Ralte hian a rawn sa ta a ni.