‘Get Out’-in Lego a pet chhuak

North America-ah chuan The Lego Batman Movie chu ‘Get Out’ film-in a pet chhuak a, he film, horror lam deuh, thriller rawngkai deuha ngaih theih tur bawk film hian kar tawp chhung khan USD mtd 30.5 zet a thawk chhuak.

‘Get Out’ film hi a hmuhnawm viauin a rinawm a, a thawnthu ruangam a ṭha a, a ngaihnawm zawng pawn a ngaihnawm. Daniel Kaluuya chu a changtu pa, Chris Washington lemah a chang a, Allison Williams chu a changtunu, Rose lemah a chang. Rose hian a bial­pa midum, Chris chu a nu leh pate hmuhtir turin an khuaah a zinpui a, an in an thlen chuan, Rose te ina an midum awmpuite chuan Chris chu an in chhuahsan vat turin an hrilh a, amaherawhchu a sawi aiin a tak taka chu in chhuahsan chu thil harsa zawk daih a lo ni. Chris chu an inah chuan phuarhlawm a ni a, mingo, upa tawhte hriatna thiang chu an mi man behteah suan kual a, hman ṭangkai an ni tih a hre chhuak a, a chunga an thil tihah chuan a bialnu Rose ngei pawh chuan a chhungte lam a ṭan. Chutiang dinhmun harsa aṭanga tlan chhuah a tumna film a ni.

The Lego Batman Movie chu pahnihnaah a tla thla a, kar tawp chhung khan USD mtd 19 a hlawh chhuak. Keanu Reeves channa, John Wick: Chapter 2 chu pathumnaah awm­in, USD mtd 9 a hmu chhuak.

Box office movies

“Get Out” - $mtd 30.5

“The Lego Batman Movie” - $mtd 19

“John Wick: Chapter 2” - $mtd 9

“The Great Wall” - $mtd 8.7

“Fifty Shades Darker” - $mtd 7.7

“Fist Fight” - $mtd 6.4

“Hidden Figures” - $mtd 5.9

“La La Land” - $mtd 4.6

“Split” - $mtd 4.1

“Lion” - $mtd 3.8