Model Nina Agdal pawisa nei mang loin US a thleng thla

Victoria’s Secret model, model hlawhtling ni chho ta mek, Nina Agdal hi hlawhtling tura a zin kawngah retheihna a paltlang ve hle. Modeling industry lian zawka luh tum rilru leh, hlawh­tlinna beiseia US a thlen thlak khan chaw vawi khat ei leina bak a nei lo.

Nina Agdal hi Denmark-a Hil­lerød khuaa mi a ni a, sap ṭawng pawh thiam ṭha vak lo a ni a, chuti chung chuan eizawnna ṭha zawk leh hlawhtlinna hmuh tumin US hi a pan ve rawih a ni. US a thlen thlak hian USD 40 chiah a nei tawh a, hetihlai hian kum 18 mi chauh a ni.

Sap ṭawng a thiam lo a, school-ah pawh a thiam theih loh zawng tak a ni. Maxim chanchinbuin an kawmnaah, “English hi school-ah pawh ka thiam theih loh ber mai subject a ni. Sap ṭawnga ṭawng hi ka zak a, hman pawh ka hreh phah hle. USD 40 nen chauh US ka thleng a, chu baka ka thil neih dang leh chu model apartment awmna hmun inziahna lehkha them a ni leh mai,” a ti.

Sap ṭawng thiam loh leh hman dik loh inhmuhsit vak an chîng ve loin, Sap ṭawng an chhehsual inthehlarsak vak vak awm lo mah se Agdal chuan Denmark aṭanga Florida a thlen thlak hian Sap ṭawng hman a hreh viau tho a, mahse, tuna kum 24 mi Agdal hi a eizawnna kawngah a hlawhtling tawh a, Sap ṭawng pawh a thiam hle ta.