Mathlenga a rawn lang leh e

Kum 2007 Mizo Idol aṭanga ram pumina kan hriat Mathlenga kha nikum, kum 2016 chhunga kan hmuh mang loh hnuah music video thar nen a rawn lang a, TV-ah pawh pek chhuah a ni thuai ang.

Mathlenga hla thar hi kum 1980 chhoa Mizo zaithiam, Rosangkima Tochhawng hla phuah ‘Zawlkhaw dingdi’ tih hla kha a ni. He music video hi kum 1993-a kan chân tak, he hla phuahtu Rosangkima To­chhawng leh a fapa, Rothangzuala te hriatreng nana tih a ni. Mathleng­a hian ‘Zawlkhaw dingdi’ tih hla bakah hian hla dang pakhat pawh a peih tawh a, mahse tunah erawh a dah chhuak nghal rih lo ang.

‘Mizo thawnthu’ hla kha kum 2015 kum tawp lamah Ṭhazual chart-ah kan hmu a, chumi hnuah Mathlenga hla dang kan hmu ta mang lo; fam ngaih hla ang chi chu a siam a, mahse Ṭhazual chart-a han lang chi erawh a ni chiah lo. Kum 2016 chhung khan kan hmu mang lo a, kum 2017 a rawn thlen meuh chuan music video thar kan hmuh mai bakah, dah chhuah mai tur leh hmachhawp dang nei chungin kum a chuangkai.

‘Zawlkhaw dingdi’ tih hla phuahtu Rosangkima Tochhawng phuah tho ‘Di ngaih’ tih hla chu sain Mathlenga hian music video pawhin a peih tawh a, amaherawhchu TV lama tihchhuah tur erawh chuan a la dah rih lo. “Hun ka la nghak rih deuh ang a, thla hnih thla thum hnu velah chuan ka dah ang ka ring,” a ti. Hei bakah hian hmachhawp dang neuh neuh a la nei a, ‘Vala’ tih chu hmachhawpa a neih zinga mi a ni a, chubakah chuan Naupang pawnto hlate pawh a nei a, music video-a a siam hun tur erawh a sawi thei lo. kumin hi chuan Mathlenga kan hmu mawlh mawlh turah ngai teh ang.

Lêngzêm aṭanga lênglawng lama insawn deuh deuh a rilruk mek. ‘Love song hi ka rilruah a tla na lo hle a, lenglawng lama na zawka kal ka tum. Amaherawhchu mi hian min ngên a, love song lam hi sak a ngai leh ṭhin,” a ti.