NASA-in Ni-ah robot tirh a tum

NASA chuan nakkum­ah Ni-a robotic spacecraft tirh tumin a inruahman mek a, tihhlawhtlin a nih chuan Ni nihphung chiang lehzualin a hriat theih dawn a ni. Thlaah te, Mars-ah te leh a aia hla zawkah te spacecraft hi tirh a ni tawh a, Ni-ah hian tirh a la ni lo. Ni hi kan awmna lei aṭangin Km maktaduai 149-a hla a ni.

Scientist ten hriat chian an duh em em pakhat chu Ni-a a pawnlawi ber, a tuamtu atmosphere Corona aia Ni tak tak chhunga a pawn ber Photosphere dai/ sa lo zawk hi a ni.

Goddard Space Flight Centre-a NASA scientist, Eric Christian chuan, “Ni thleng tura kan mission hmasa ber a ni a, mahse Ni chhunga tak tak chu kan thleng thei lo,” a ti a, amaherawhchu he robotic spacecraft hi an tirh chuan scientist tena hriat an châk thil pathum an hre thei dawn a ni.

NASA-in a tarlan dan chuan Ni-a a corona, a tuam­tu ber hi Celsius deg­ree maktaduai hnih vela sa a ni a, chutihlai chuan corona hnuai, corona-in a tuam chhung hnuaia mi Photosphere chu Celsius degree 5,500 chauh a ni thung. A sa tur zawka ngaih a sa lo tlat zawk hi a mak a, a chhan hriat an duh a ni.

Hei baka hriat an duh dang chu solar wind hian engtin nge speed a neih theih tih hi a ni. NASA chuan, “Ni hian charged particle-te chu darkar khata mêl maktaduaia chakten a chhêm chhuak ṭhin a, hetiang taka chaka a chhêm chhuah theihna chhan hi kan kan hre lo a ni,” a ti. Hriat an duh dang leh chu Ni hian a khât tawka high-energy particles, hlauhawm tak mai a pek chhuah chhan a ni.

NASA-in robotic spacecraft a siam tur hi Celsius degree 1,370-ah pawh chhe lo tur, carbon-composite shield, centimetre 11.4 zeta chhah tuam tur a ni.