Rihanna-i’n College kal a tum

Thawhlehni khan Rihanna chu Harvard University-in mite ṭanpuina lama a thawh ṭhat avangin Humanitarian of the Year Award an hlan a, hetah hian college kal leh chungchang a sawi chhuak.

A lar hma a, chuvang chuan college pawh a kal lo. Tuna hlawhtlinna hrang hrang a neih hnu hian zir hniam lutuk chu hrehawm a ti ta deuh a nih a rinawm a, college kal thu hi a sawi chhuak a ni. Rihanna hi high school a kal laiin a zirna a chawlhsan a, music lamah a lut zui ta a ni.

Hei bakah Rihanna hian tunhmaa a chak ṭhin chu hausa tak ni a, khawvel hmun hrang hranga naupang chhanhim ngaite chhan a chak ṭhin thu a sawi a, a duhthusam tihlawhtling thei turin tunah chuan a hausa a, a duhthusam ṭhin pawh a tihlawhtling mek. Khawvel hmun hrang hranga ṭanpuina lam thila sum leh pai a pek chhuah bakah hian a pianna, Barbados-ah oncology centre a din a, chu mai bakah chuan Caribbean zirlai, US-a lehkha zirte tan scholarship a siam bawk.