"Kan pali (BLACKPINK) hian mi pakhat ang mai kan ni" - Rosé

Rolling Stone chuan Nilaini khan Rosé an interview-na an tichhuak a, chutah chuan Rosé chuan a solo project chungchangte sawiin, BLACKPINK chungchangte leh Dua Lipa a hmuh chungchangte a sawi chhuak a, BLACKPINK chungchang a sawinaah "Kan pali (BLACKPINK) hian mi pakhat ang mai kan ni," a ti.

Rosé hian nikum March thla khan a solo project -R-, hla pahnih 'On the Ground' leh 'Gone' awmna a tihchhuah chungchang chu sawiin Lisa, Jennie leh Jisoo-te tel loa hun hman chu chona lian tak a nih thu a sawi. "Kan pali hian mi pakhat ang mai kan ni. Mamawh hunah kan inpui tawn reng ṭhin a, mi pakhatin eng niah emaw a dinhmun ṭha ber a hmang lo a nih chuan, an aiawhin kan awm mai ṭhin," tia sawiin a solo project chungchang a sawi chhunzawm a,"Mahnia din kha a zamawm hle. Hun kal tawhah BLACKPINK-te min thlawptu an nihzia min hmuhfiahtir a ni. Kaldan tur ka hriat loh pawhin ka va call a, an ngaihdan ka la ṭhin. Ka solo project chungchangah pawh ka tan an awm reng a ni," a ti.

Dua Lipa concert-a a kal chungchangte sawi bawkin"Tun hnai lawk khan Dua Lipa concert-ah ka kal a, a aw kha, a aw mawlh mai kha, a ropui tak zet a ni. A thiam lutuk a, awmdan tur pawh ka thiam lo hial zawk. Fangirl ka ni chiang hle," tiin a sawi bawk.

Tunhnaiah hun eng emaw chen chu BLACKPINK hian thawm lian an nei tawh loa, kumin kum tawp lamah erawh album thar an tichhuak mai thei nia sawi thawm te chu a awm thung a ni.