Your Sweetest Memories hla thar DARBU lamah

Mizo band Your Sweetest Memories (YSM) chuan nizan khan hla thar 'Hmelṭha Sensiar' an tichhuak a, he hla hi tunhnaia Mizo rimawi app thar Darbu lamah a ngaihthlak theih tawh a ni.

YSM hi YouTube lam aṭangin ṭhenkhat chuan kan hmelhriat tawhin a rinawm a, anni hi tunlai ṭhalaite ngainat zawng tak Indie Rock lam pawl si, 80’s style-a synth mawi takin a hruai, snare ri mawi leh nghet takin a chawm, Mizo hlathu ngei a music ṭha tak tichhuak ṭhin an ni. An hla te chu tunlai tak, mi tin ngaihthlak theih si, zinkawng a ni emaw, hnathawhna a ni emaw, taksa insawizawi pah leh mut hmunah pawh ngaihthlak nuam em em a ni hlawm.

Jt Production album thar pawh Darbu lamah tho
May 13 khan tunlai zaithiam lawm hlawh em em Jt Production chuan a album pahnihna 'Rimawi dul' chu a tlangzarh a, a tlangzarh rual hian ngaihthlak tur a awm mai lo. Mahse tunah chuan Darbu app lamah dah chhuak tawhin a duh piang tan a lei theih ta bawk e.

'Rimawi dul'-ah hian hla 10 a awm a, Darbu app kaltlang hian Rs. 150-in a lei theih reng tawh a ni.

Darbu App hian zaimite tan kawng thar a hawn aṭangin Album puitling siam a tih chhuah tum an awm chho ta nual niin Darbu App enkawltu lam chuan an sawi a, 'Rimawi Dul' album hi hmahruaitu atan tihchhuah a ni ta a ni. Darbu App hi playstore-ah leh Appstore-ah te download theih a ni.