Goodfellas Actor Ray Liotta a thi

Lemchan thian Ray Liotta, Martin Scorsese gangster classic film 'Goodfellas' aṭanga hriat hlawh tak chu kum 67 mi niin a thi tih Ningani khan puanzar a ni.

Ray Liotta hian lemchan lamah sulhnu a hnutchhiah ṭha hle a, 1980's chhoah khan film eng emaw zatah inlan mah se kum 1990-a 'Goodfellas'-a a chan aṭang khan hriat a hlawh lehzual a ni. Film 80 chuangah inlan tawhin tunah pawh hian a film channa tlangzarh lohte pawh a la awm a, Elizabeth Banks-i film buaipui mek 'Cocaine Bear'-ah pawh inlan tur zingah telin film chan hmabak panga vel a nei mek bawk.

Liotta hi 'Dangerous Waters' film changa Domincan Republic-ah a cham mek laiin a hotel room-ah a mu hlum a ni.