Pentecost Fak Zai ; Chaltlang nula Lalhriatkimi a thiam ber

Pentecost Fak Zai inelnaah C. Lahriatkimi aia thiam zawk an awm lo - Zirtawpni zan khan Mizoram UPC kohhran huang chhunga zaithiam inelna hi a hmawr bawk a ni a, Grand Finale-a mi panga intihsiak aṭangin Chaltlang nula C. Lalhriatkimi chu a thiam berah puan a ni a, tluktu an awm lo.

Dawrpui Multipurpose Centre-a neih Fak Zai Grand Finale-ah hian zaithiam pangain inelna an hmachhawn leh a, top 10 aṭanga thlanchhuah C. Lalhriatkimi, Rebek Vanlalnunpuii, Michael CR Lalpianfela leh K. Lalnunpuii ten music track leh live music hmangin hla pakhat ṭheuh hmangin inelna an hmachhawn.

A zai laia mipuiin kut beng leh ding chung meuha an lawm, C. Lalhriatkimi chu a tawpah zaithiam bera puan a ni ta a, 'A saw raltiang tlangah' tih hla a rawn thlawh zet chuan chhimtu mipui lawm a hlawh hle.

Fak Zaia tel zinga naupang ber, kum 16 mi Rebek Vanlalnunpuii chu pahnihna a ni a, Thingsulthliah tleirawl aw hian ngaihno a bei a, a che vel hmuh a nuam a, mipui ngaihven a la hlawh dawn chauh ang tih a chiang.

'Leikapui Style' ngata zai ṭhin, zai lunglenthlak leh nung em em mai, Vanlalduhsaka chu pathumnaah thlan a ni a, Kolasib Ṭumpui tlangval hian Grand Finale-ah pawh Rodingliana hla pahnih hmangin inelna a hmachhawn - a hmuna he intihsiakna chhimtu, Mizo legend Rodingliana pawh Duhsaka zaiah hian a lung a awi!

Fak Zai Grand Finale-ah hian top five-ten "Kan PYD Zel dawn" tih hmangin kalkhawm mipui an awi a, Fak Zai Band-ten 'Pathian Pakhat' tih hmanga mipui an awi pawhin boruak a siam hle.

Hun rei tak chhung Mizoram music khawvela a reh hnuah, Mizo legend, 'Khawpui Mawi' leh Tlanna Mak tihte hmanga Zoram mipui lo awi tawhtu Rodingliana chu Grand Finale-ah hian a inlan a, tun hnaia hla rawn lar thar leh, tun hmaa Zoram mipui awihna hla lo tling tawh 'Tuinung lui' phuahtu leh sa lar hmasatu K. Vanlalhnema pawh a thiam ngaiin a la thiam reng.

Kum 72 val a ni tih hriat loh khawpa zuanzang Ngurthangvela'n zai leh lamin mipui a la awi thei a, a che vel mit ngeia hmutu tan chuan kum 70 a chuang tawh tih a sawi chu thilmak a tling - "Kum 90 thleng zaia lam ka tum," a ti!

Fak Zai chief judge Rev. Dr. Ngurthanpara Sailo chuan, "Kan beisei ang zaithiam kan hmu chhuak a, inelna a nih avangin a sang zual pathum thlan a ngai a ni mai a, anni zinga mi ni kher lo, a bik takin top 10 chin kha chu zaithiam tak tak an ni vek tawh. Kan buatsaih chhanah kan hlawhtlingin ka hria a, Pathian faka zai duh ṭhalai heti zat kan la nei hi ka lawm em em bawk a ni," tiin Vanglaini a hrilh.

Pentecost Fak Zai hi General PYD Literature Committee leh Literature & Publication Board ṭang dunin an buatsaih a ni a, Zonet chu media partner niin, anni hian inelnate an television channel kaltlangin an pe chhuak ṭhin a ni.

Pentecost Fak Zai
Pakhatna C. Lalhriatkimi Chaltlang
Pahnihna Rebek Vanlalnunpuii Thingsulthliah
Pathumna Vanlalduhsaka Kolasib Ṭumpui

Pentecost Fak Zaia pakhatna ka ni thei hi Pathian malsawmna a ni a, Pathian hnenah lawmthu awm rawh se. Intihsiakna kan neih chhung zawnga min support-tu Chaltlang PYD te, nasa taka min fuih ṭhintu leh min ṭawngṭaipui ṭhintu ka chhungte leh ka rawngbawlpui te, sum leh pai leh thilpek min petute zawng zawng chungah ka lawm em em a ni. - C. Lalhriatkimi, Chaltlang

Pentecost Fak zai intihsiaknaa pahnihna dinhmun ka din theihna chhan hi a bul berah chuan Pathian vang a ni a, ka chhungte zawng zawng min support naah ka lawm a, lawmthu sawi sen loh ka nei a ni. Kawng engkima min puitu leh thilpek min petu zawng zawngte chungah lawmthu ka sawi vek a ni. Engkimah Pathian ropui ber se, Pathianin talent min pek hi a ropui nan hman zel ka tum ang. - Rebek Vanlalnunpuii, Thingsulthliah

Beisei phak bak a ni. Pathian faka chawimawi hi a nuam a, dinhmun ropui tak beiseia tel ka ni lo. Intihsiak chhung zawnga min thlawptu leh thilpek min petute chungah lawmthu ka sawi a, Kolasib Venglai Bial leh ka lawina kohhrante thlawpnaah lawmthu ka sawi. Ka lawmman dawn zawng zawng pawh Pathian chawimawi nan kan kohhran committee-ah ka hlan a ni. - Vanlalduhsaka, Kolasib Ṭumpui