Oscar dawngtu puan sualnaa mawhphurtu pahnihte an hrem

Best Picture puan a nih dawnin, envelop-a Best Actress awmna zawk pek a nih a, puan sual a nih taknaa mawhphurtu bera ngaih accountant pahnih chu Oscar thuneitute chuan an hrem.

Envelop pe sualtu hi Brian Cullinan leh a thawhpui, Martha Ruiz te an ni a, Academy thuneitute chuan he mite pahnih hi film academy thil tihnaa inhnamhnawih tawh lo turin an hrem a, Oscars sem leh reng rengah engmah an kutah an dah tawh lo ang.

Academy of Motion Picture Arts and Sciences-a president, Cheryl Boone Isaacs chuan PwC aiawh Brian Cullinan leh a thawhpui hi an thil tihnaah an tel tawh ngai dawn lo tih a puang chhuak.

Chanchinbuten an tarlan dan chuan Warren Beatty leh Faye Dunaway ten Best Picture award an present dawn lai vel hian Cullinan hian hi backstage-ah Emma Stone thlalak twitter-a dahin a buai hle a, hei vang hian ngaihtuah chiang mang lo a, envelop dik lo zawk a pe ta niin an sawi.

Oscars-ah khan kha chauh kha thil dik lo a ni lo a, costume designer, Janet Patterson hriatrengna hun an hman laiin ama thlalak aiah produ­cer, la dam reng Jan Chapman thlalak zawk dah chhuah a ni. Heng thilte avang hian Oscar Award buaipuitute chuan thupha an chawi nasa hle.