Taylor Swift-in a hla hlui Record ṭhat leh chak ber a sawi chhuak

2021 Grammy-a nomination paruk lai hmutu, kum 10 chuang rimawi khawvela a 'top' dinhmuna ding deuh char char thei Taylor Swift chuan Nilaini khan 'Good Morning America'-a a inlannaah a hla hlui record ṭhat leh a chak ber a sawi chhuak.

'Good Morning America' anchor George Stephanopoulos zawhna chhangin Taylor Swift chuan a hla hluite record ṭhat leh chu nuam a tih ṭhin thu leh, zawhna chhanna atan chuan 'Love Story' a nih a rin thu a sawi. "Ka hla hluiahte khan ka aw a la tleirawl hle a, a chang chuan ka record hlui leh tuna ka hlate ka ngaihthlaka ka khaikhin hian zaithiam dang ka ni tawh maiin ka hre ṭhin," tiin a sawi. 

Swift hian Big Machine Records label hnuaiah a hla hlui eng emaw zat a record ṭha mek a, Scooter Braun-a'n a album hmasa parukte neitu nihna a hralh sak hnuah khan a hla hluite hi a record ṭhat leh a ngaih phah a, hemi a zawh fel hnuah hi chuan a hlate a fan-te tan a tlangzarh leh thei dawn a, a thuneihna hnuaiah a awm tawh thung ang. Chung a record ṭhat leh tawh zingah chuan tuna a record ṭhat leh chak ber nia a sawi 'Love Story' pawh hi a tel a ni.

Pathianni hmasa lawk pawh khan Taylor Swift hian American Music Awards-ah a award pathum lai a la leh a, chung zingah chuan favorite artist pawh a tel a ni. Mahse a hlate record ṭhaa studio lama a luh deuh zak zak avangin AMA-ah pawh hian chawimawina dawng tur hian a inlan thei lo.

Taylor Swift hian concert documentary thar, Folklore’ Film tia an sawi mai 'Folklore: The Long Pond Studio Sessions' chu a tlangzarh dawn a, YouTube lamah a trailer pawh a dah chhuak tawh nghe nghe.

Folklore: The Long Pond Studio Sessions-ah hian film bakah studio-a live album a record pawh a tel dawn a, Folklore-a a thawhpui Aaron Dessner leh Jack Antonoff-te pawh an inlan dawn a ni.

Taylor Swift Documentary thar hi  Disney+-ah a en theih dawn a, a fan-te tan chuan a hlu leh dawn hle tih a hriat theih.