Miss Chapchar Kût 2017 R. Lalrinmawii
Nimin khan Mizote kût pui ber, Chapchar Kût hman a ni a, hemi denchhen hian Diktawn chanchinbu chuan Miss Chapchar Kût a thlang a, Miss Chapchar Kût atana thlan chhuah hi Govt. Complex nula, R. Lalrinmawii a ni. Diktawn chanchinbu hian kum 2009 aṭang khan Miss Chapchar Kût hi an lo thlang tawh a ni.
Miss Chapchar Kût atan hian scout ten Chapchar Kût hmanna pui ber, Lammual aṭangin Mizo nula, an inthuamnaa Mizo traditional lang thei leh chutianga inthuam
aṭangin nula 100 chuang thur chhuakin, judge ten heng aṭang hian mi 20 an thlang chhuak a, chuta ṭang chuan top 10 an thlang chhuak leh. Top 10-te hi - Ruth Remlalfakawmi, Ramthar; R. Lalrinmawii, Govt. Complex; Lalnunziri Khiangte, Chanmari; T. Ramthanmawii, Republic Veng (N. Khawbung); Laltlanchhungi, Republic Veng (Ṭhiak), Lalremruati Ralte, Chhinga Veng; Christine Zonunpuii, Republic Vengthlang; C. Lalmuankimi, Falkland; Christina Lallawmsangi, Chaltlang leh Malsawmdawngi, Kulikawn te an tling.
Top 10 aṭang hian Top 5 thlan chhuah a ni a, Top 5 aṭang hian Miss Chapchar Kût thlang chhuakin, Miss Chapchar Kût atan hian R. Lalrinmawii, Govt. Complex chu thlan chhuah a ni ta a ni. R. Lalrinmawii hi October 4-a piang a ni a, a pa chu R. Zosangliana niin, a nu hi Lalchhanhimi a ni. Govt. Mizo Higher Secondary School-ah kalin Commerce subject a la a, Class XI a zo chiah a, Class XII tur a ni a, ft 5 leh inchi 5-a sang a ni.
First Runner Up-a puan hi Malsawmdawngi, Kulikawn a ni a, ft. 5 leh inchi 11 zeta sang a ni. Second Runner Up hi Lalremruati Ralte, Chhinga Veng niin, Third Runner Up-te hi C. Lalmuankimi, Falkland Veng leh Christina Lallawmsangi, Chaltlang te an ni.
Miss Chapchar Kût hian Rs. 10,000 bakah washing machine leh Crown a dawng ang a, Runner Up hian Rs. 1,000 leh smartphone a dawng ang. Hei bakah hian Miss leh runner up-te hian citation, photo frame leh lehkhabu Rs. 5,000 man hu an dawng bawk dawn a ni. Lawmman hi ni dangah, a hranpaa pek an ni ang.
Chapchar Kut miss hi District dangah pawh thlan a ni hlawm. Lunglei District-ah chuan Vanlalnunpuii, Electric Veng chu Chapchar Kut miss-a thlan a ni. Ani Rev. Vanlalluaia fanu niin, M.A. a zo tawh. Siaha-ah chuan K. Lalchhanhimi, D/o K. Lalfakzuala, New Siaha chu Miss-a thlan a ni a, Malsawmtluangi Siakeng, D/o Lalchhuanawma, New Colony leh Vanlalzarzovi Rualleng, D/o Hrangduna, New Colony te chu Eunner Up an ni.
