Black Panther 2-ah Rihanna a tel dawn lo

Black Panther 2 nakkum lamah an chang ṭan dawn tih a chian hnu lawkah zaithiam Rihanna chu Black Panther 2-ah hian a inlan ve mai thei niin thuthang a awm a, a darh nasa hman hle a, mahse E! News chuan hei hi thuthang dik lo a nih thu an tichiang.

Google lama Black Panther 2 Cast list-ah Rihanna hi a tel hial hman a, netizen lam chuan an ngaihven hman hle a, thuchiang hriat lawk theih a nih loh avangin mi tam tak chuan a inlan dawn niin an ring hman. Mahse Wakanda-ah Rihanna hi kan hmu leh rih dawn ta lo a ni.

'Umbrella' hla hmanga khawvel deng chhuaktu Rihanna hian lemchan lamah pawh talent a neih ṭhat zia a lo pho chhuak tawh a, Ocean's Eight leh Battleship-ahte pawh inlan tawhin lemchan lamah sulhnu a lo hnut chhiah nual tawh a, Marvel Cinematic Universe lamah erawh kan hmu dawn rih lo thung.

Black Panther 2 hi nakkum July thla hian Atlanta-ah chan ṭan an tum a, kum 2022-ah tlanzarh hman an tum bawk. Englam hawi nge tih leh tunge Black Panther lemah chang dawn tih engmah la chiang lo mah se Black Panther film hmasaa T'Challa nau Shuri lem chang Letitia Wright chuan Black Panther suit a rawn hak ring an tam hle a ni.