Alicia Keys-in BTS hla a cover, lawm a hlawh

K-Pop giant BTS hla thar ber 'Life Goes On' chu 'No One' hitmaker Alicia Keys chuan a cover a, BTS fan-te chuan an lawm hle a, BTS ngei pawh hian twitter-ah an lawm thu an tarlang.

Keys hian 'Life Goes On' a cover-na hi twitter-ah a dah a, piano play-in English-in a letling a, a sa a ni. Hei hian lawm a hlawh hle a, darkar 12 chhungin twitter-ah ringawt pawh mi maktaduai thumin an thlir hman.

BTS chuan twitter-ah Alicia Keys zai hi retweet-in chawimawina ropui tak a nih thu an ziak a ni.

November 19 khan BTS hian an music video thar ber 'Life Goes On' hi an tlangzarh a, nimin thleng khan YouTube-ah chuan thlirtu maktaduai 144 chuang an awm tawh. BTS huhang ngah zia sawi nawn a ngai lo a, tunah phei chuan Grammy award nominee hial an ni tawh. Nakkuma sem tur 63rd Grammy Awards nomination list tihchhuahah khan an hla 'Dynamite' vang khan Best Pop Duo/Group Perfomance Category-ah an hming a lang a, K-Pop band zingah hetiang dinhmun thleng thei hmasa ber hi niin record duhawm zawk an siam thei dawn em tih chu Army-te nghahhlelh ber pakhat a ni ngei ang.