Indian Navy Officer thar zingah Mizo tlangval

VL Malsawma s/o VL Zaikima, Khatla Bethel, Aizawl chuan Asia khawmualpuia Naval Academy lian ber, Indian Naval Academy, Ezhimala, Kerala aṭangin vawiin, dt. Inrinni khan training a zo a, Indian Navy-ah Commissioned Officer niin, Sub Lieutenant a ni.

Khatla tlangval VL Malsawmzuala hi VL Zaikima leh Hmangaihzuali (L) te fa paruk zinga naupang ber a ni a, Class VII thleng Gospel Centenary School, Mission Veng, Aizawlah kalin Class VIII aṭanga Class XII thleng chu Rashtriya Indian Military College, Dehradun-ah a kal thung. Class XII a zawh hnuah UPSC buatsaih NDA & NA Examination-ah tlingin, NDA-ah hian kum thum chhung graduation course training hautak tak paltlangin nikum May thla khan a pass chhuak a ni. Infiam lam pawh a thei hle a. RIMC-a a kal lai hian boxing-ah medal engemaw zat a la a, NDA-a a awm lai hian Divisional Cadet Captain a ni phak a, Best Helmsman in Yachting Award a dawng nghe nghe.

NDA aṭanga a chhuah hnu hian Indian Naval Academy-ah a training chhunzawm a, hetah hian term khat (thla ruk) an training phawt a, chumi hnuah Training Squadron-ah Indo lawng, INS Sujata-ah 'sea training' thla ruk chhung an nei leh a ni. INA a awm lai hian Senior National Sailing Competition-ah INA aiawhin a tel bawk.

Indian Navy-ah hian Sub Lieutenant niin, Vizag Naval Base lamah Indo Lawngah (onboard ship) a awm dawn a ni.