Miss Mizoram Contestant leh MJA inkâwm

ZONET Cable TV Pvt. Ltd.-in Miss Mizoram 2017 a thlan meka contestant-te chu Inrinni khan Hotel Regency-ah Mizoram Journalists’ Association (MJA) member-te nen an inkâwm. Inkawm­hona hi ZONET puipate zinga mi, RK Lianzuala’n a kaihruai.

MJA president Vanlalrema Vantawl chuan, Miss Mizoram neitu chu MJA a nih thu sawiin, kum 1983-ah khatih laia MJA president J Lalthangliana hoa Miss Mizoram thlanna bul ṭan a nih thu a sawi.

MJA President chuan, Miss Mizoram thlan ṭhin chu eng emaw chen a khaihlak hnuah ruahmanna fel tak nena ZONET-in changtlung leh hlu zawk­a a buatsaih leh ta chu lawm­awm a tih thu a sawi a; tun ṭuma contestant-te chu mipuite enbik leh chhinchhiah bik an ni tih sawiin, kawng hrang hranga mipuite kaihruaitu nih tum tur te, an hmabakah an nihna leh nih lohna thlenga sawichhetu an awm pawhin, huaisen taka hmachhawn a, tuang tichhah tlat turin a chah.

RK Lianzuala pawhin Miss Mizoram contes­tant-te chu mi pangngai nih a ṭul huna mi dangte zâwl tâwka awm thiam tur leh mipui chung lam an nihna hmun thliar thiam turin a chah bawk.

He inkawmhonaah hian MJA member-te leh Miss contestant-te’n an duh zawngte an sawi bawk a ni.