'Top Gun: Maverick'-in $mtd 124 a rawn thlawh luhpui!
'Top Gun' film hmasa tihchhuah aṭang khan kum 36 lai a liam tawh a, nghaktute'n an nghak rei fan fan bawk a; a chhunzawmna tihchhuah a ni chiah chu ni thum chhung lekin $maktaduai 124 lai a lalut hem mai alawm!
Tom Cruise kan hria, lem a chan thiam zia pawh ka hria. Academy awards pawh pathum lai a dawng tawh. Film pawh a chang hnem tawh viau. Chung a film chan tawh zawng zawng zingah chuan 'Top Gun: Maverick' hian tlangzarh karah sum a lalut tam ber zu nia! Tom Cruise film chan tawhna zawng zawngin a sum lakluh belhkhawm chu $tluklehdingawn 10.1 a tling hial!
Kar tawp liam ta chhung khan US-a theatre 4,735-ah chhuah a ni a, $126,700,000 lai a lalut. North America Box Office-ah khuan nimin thleng khan $mtd 170 a lalut tling tawh a, ram hrang hrang aṭanga a sum lakluh belhkhawm phei chu $mtd 282 a tling der tawh a ni.
Critics-te thlirna tlang aṭangin
Kum 1986-a tihchhuah 'Top Gun' kha en tawhte chuan hmuhnawm an tihzia hahipin an sawi ṭhin. Tuna a chhunzawmna an tihchhuah 'Top Gun: Maverick' hi film review-tu ṭhenkhat chuan film hmasa ai khan a ropui zawk niin an ngai.
Rotten Tomatoes lamah pawh review-tu an tam a, critics 327 laiin review hnutchhiahin rating 8.2/10 lai a hmu. Tunhnaiah film tlangzarh zingah chuan rating hmu sang ber pawl a ni.
Miles Teller, Jennifer Connelly, Jon Hamm, Glen Powell, Lewis Pullman, Ed Harris, leh Val Kilmer-te channa film hi a ropui chho zel dawn niin a lang a, kumin chhunga film tlangzarh zinga sum lalut tam pasarihnaah a inhlangkai nghal bawk. Karleh lamah phei chuan a dinhmun hi nasa takin a san chhoh rin a ni.
Film thar dang
'The Bob's Burgers Movie' chu theatre 3,425-ah chhuah niin $12,435,000 a lalut a, pathumna a ni. 'F3: Fun and Frustration' chu 10-na a ni phak bawk.
Box Office Mojo chart-ah film 28 chiah an tarlang a, chung zingah chuan 'Rite of the Shaman' (24) leh 'A Chiara' (25)-te chu film thar an ni bawk a ni.
Box Office top 10:-
1 Top Gun: Maverick $126,700,000
2 Doctor Strange in the Multiverse of Madness $15,855,000
3 The Bob's Burgers Movie $12,435,000
4 Downton Abbey: A New Era $5,750,000
5 The Bad Guys $4,340,000
6 Everything Everywhere All at Once $2,510,345
7 Sonic the Hedgehog 2 $2,435,000
8 The Lost City $1,835,000
9 Men $1,224,692
10 F3: Fun and Frustration $1,028,000