Indian rapper fam ta Sidhu Moose Wala-in uitu a ngah

Kum 28 mi lek ni chunga India ram mai ni lo, ram hrang hrang rimawi khawvela sulhnu ṭha tak hnutchhiahtu, Pathiannia Jawaharke khua, Punjab-a kah hlum tak Sidhu Moose Wala chuan uitu a ngah a, uina thu ziaktu zingah Canadian rapper Drake pawh a tel.

Drake hian Pathianni zanah khan a Instagram story lamah Drake leh a nu thlalak chu tarlangin 'RIP MOOSE @sidhu_moosewala' tih a ziak a ni. Drake hian Sidhu Moose Wala-te hi kum 2020 khan a follow a, chu chuan ngaihven a hlawh hle tawh a nih kha.

Indian star zingah pawh uitu an tam a, Ranveer Singh, Vicky Kaushal, Diljit Dosanjh, leh composer Salim Merchant-te pawhin uina thu an ziak a ni. Ajay Devgn, Richa Chadha, Kapil Sharma, Swara Bhasker, music composer Vishal Dadlani, leh TV host lar tak Rannvijay-te pawh Twitter lama Moose Wala uina thu ziaktu zingah an tel.

Sidhu Moose Wala kha...
Singer leh rapper a nih bakah lemchan lamah pawh a inhnamhnawih a, politician a ni bawk. A album hmasa ber PBX1 chu Billboard Canadian Albums Chart-ah a lang hial a 66-na a ni phak. A single paruk lai chu global YouTube music chart-ah a lang phak bawk. UK single chart-ahte pawh a hming a lang zak zak tawh a , The Guardian phei chuan '50 up and coming artists' a tarlan zingah a telh hial.

A hming tak Shubhdeep Singh Sidhu hi Indian National Congress-ah member niin kum 2022 Punjab Legislative Assembly inthlanah khan a ding a, hnehna erawh a chang zo lo a ni.