Miss Mizoram 2017 Tunkar Zirtawpni zanah Grand Finale

Miss Mizoram 2017 chu intihsiakna chi hrang hrang neih tawh hnuah tunkar Zirtawpni zan, March 10 zan hian Grand Finale a awm tawh dawn. Grand Finale hi MZU Multipurpose Hall-ah dar 8-a ṭan tur a ni ang.

Miss Mizoramah hian judge panga an awm a, chungte chu Lucy Sailo, Charlie Mathlena, Susan R. Ralte, Edward Lalrempuia leh Priyadarshini Chatterjee te an ni a, Priyadarshini Chatterjee hi Femina Miss India World 2016 niin, Miss World 2016-a India ram aiawhtu a ni a, Top 5-ah pawh lang phak hial a ni. North East mi, Miss World-a India aiawh hmasa ber a ni bawk.

Subtitle 12 lai a awm. Miss Congeniality te, Miss Personality, Best Gown, Miss Beautiful Hair, Miss Beautiful Smile, Miss Beautiful Skin, People's Choice, Miss Talent, Miss Active, Miss Perfect 10, Miss Photogenic leh Miss Catwalk te a ni.

Grand Finale-ah hian entry ticket siam a ni. Ticket hi Rs. 300 leh Rs. 1,000 man te a awm dawn a, Rs. 1,000 man bik­ah hian dawhkan an kil dawn. Ticket hi vawiin aṭangin ZONET Office-ah lei theih a ni.