Emma Watson-i’n thlalakpui a duh tawh lo

I hmu remchang ve hlauh a nih pawhin tunah chuan Harry Potter-a a changtunu, Emma Watson hi thla i lakpui thei tawh dawn lo. Thlalakpui a duh tawh lo a, thla an lakpui chhen chuan miin a awmna hmun an hre thei zel dawn niin a ngai.

Emma Watson chuan, “Miin thla min lakpui chuan an post nghal thuai a, second hnih leh chhungin internet-ah midangin an lo hmu a, ka awmna aṭanga metre 10 bial hi an rawn hre thei nghal zel dawn. Eng kawr nge ka hak a, tu bulah nge ka awm an hre thei zel,” tiin, a privacy humhim nan mi thla a lakpui mai mai tawh dawn lo tih a sawi.

“Harry Potter ngaisangtutena an zawh duh apiang chu min zawtin ka chhang thei zel ang, amaherawhchu thlalak erawh ka duh tawh lo,” a ti. Kum 26 mi lai a ni ve tawh a, a nun pawh a venghim sawt viau.