Future a ropui a kar zawna album hran hmanga pakhatna Hauh thei

Atlanta rapper hlawhtling Future chuan hlawh­tlinna a thar a chang a ni mai lo, zaithiam awm tawhte pawhina an tih theih mang loh a rawn ti thei a, album pahnih hmanga a zawna chawlhkar hnih chhung pakhatna luah thei a ni. Billboard history-ah a hming a lang reng tawh ang.

Future hian a album thar ‘HNDRXX’ hmangin Billboard 200 chart-ah pakhatna a rawn luah a, hemi hma kar chiah hian a hmingchawia album a tih­chhuah ‘Future’ hmangin pakhatna a luah. Billboard-in a chhinchhiah danin kum 1968-a hnua chawlhkar zawna album pahnih hmanga pakhatna luah thei awm chhun a ni.

Future album thar HNDRXX hi chawlhkar liam ta chhung khan copy 121,000 hralh a ni a, a hmaa pakhatna luah, a album tho Future chu nekchhuakin, Future album hi pahnihnaah a chhuk a, copy 64,000 a hralh. Kum 1968 hma lam kha chuan Future-a record siam ang siam thei hi an lo awm tawh a, kum 1968 hnu lamah erawh kum 33 mi rapper chiah hi a ni. Album pahnih hmanga chawlhkar inzawna pakhatna luah thei hnuhnung ber chu Simon & Garfunkel kha a ni a, Bookends album leh The Graduate album hmangin Future-a hlawhtlinna ang hlawhtlinna hi an lo chang tawh a ni.

Hei bakah hian Future hi kumin chhunga Billboard album chart-a pakhatna leh pahnihna, kum khat chhung ni thei hmasa ber a ni. Nikum khan Prince chuan a album ‘The Very Best of Prince’ leh ‘Purple Rain’ hmangin pakhatna leh pahnihna hi a lo luah tawh.

Bruno Mars album 24K Magic chu pathumnaah a awm a, copy 58,000 a hralh a, Little Big Town album ‘The Breaker’ chu palinaah awmin, copy 51,000 an hralh a, Trolls soundtrack chu panganaa a ni.

Billboard album chart
“HNDRXX” - Future (121,000)

“Future” - Future (64,000)

“24K Magic” - Bruno Mars (58,000)

“The Breaker” - Little Big Town (51,000)

“Trolls” Soundtrack - Various Artists (50,000)

“Culture” - Migos (47,000)

“Starboy” - The Weeknd (46,000)

“Moana” Soundtrack - Various Artists (39,000)

“I Decided” - Big Sean (little more than 39,000)

“Vaquero” - Aaron Watson (39,000)