Midum hmusitah Mamamoo puh Thupha rang takin an chawi nghal

K-pop girls group Mamamoo chuan Zirtawpni kalta khan Seoul-ah concert an buatsaih a, hetah hian Bruno Mars hla ‘Uptown Funk’ an sakna video tichhuakin, hetah hian midum angin an inchei a, chu chuan sawizui a hlawh a, midumte hmusitah an ngai. Mamamoo hian thupha an chawi nghal.

Mamamoo concert-ah hian Mark Ronson leh Bruno Mars te hla ‘Uptown Funk’ hmanga lem an channa music video an tichhuak. Music video-ah hian an hmai chu midum angin an chei a, chubakah ‘Uptown Funk’ music video-a an incheina angin an inchei a, parody angin he video hi siam a ni.

Mamamoo hian midum anga an inchei a, inhmuhsitna lantir anga puh an nih hnu hian an Facebook page-ah thupha an chawi. “Blackface (midum anga inhnawih dum) chungchang hi kan hre tam lo a, eng angin nge nghawng a neih ang tih kan hre lo bawk,” tia sawiin, an fan-te hnenah, “Hetiang thilah leh thil dangah te pawh, zaithiam ṭha zawk leh hmasawn kan nih theih nan min zirtir a, min kawhhmuh kan ngai hle a ni a, chutiang tur chuan kan beisei che u a ni,” an ti.

Nikum khan an music video Decolamanie chungchangah an lo sawisel viau tawh a, he music video-ah hian rape culture an chawinung niin an puh a ni.

South Korea-ah hian midum an hmusit niin a lang. Kumin tir lam khan Talking Show-ah Sam Okyere langin, Ghana aṭanga he rama awm a nih thu te, a vun rawng avanga inthliarhranna a chunga an lantir ṭhin thute a sawi chhuak.