Rebecca Saimawii Zaninah a rawn 'comeback' dawn

Mizo Idol judge ṭhin, Mizo zaithiam zinga huhang ngah ber pawl Rebecca Sai­mawii chuan zanin hian hla thar a tichhuak dawn a, a zai lo ngaina tawh ṭhinte tan chuan thu lawmawm tak a ni ngei ang.

Rebecca-i hla thar tur hi 'Ngaihlungrun' tih a ni a, ama phuah ngei niin a thluk pawh ama siam ngei a ni a, kum tam tak liam hnua Pi Makuri kut chhuak ngei mai hla kan ngaithla leh thei tur hi a hlu hle a ni. MDM library-ah dah lut tawhin zaninah hian Zonet Cable  TV-ah thlira ngaih­thlak theihin an premier dawn a, dar 8-ah a YouTube channel 'Rebecca Saimawii Official'-ah a dah chhuak dawn bawk.

A music track hi Romal­sawma, Rokunga Rimawi tuk Run-in a buatsaih sak a ni a, recording leh video erawh Banga­lore lama a buaipui a ni thung. Recording studio a luh hnuhnun ber chu kum 10 chuang liam taah khan a ni a, chutiang khawpa rei zai lama a thawm a reh hnuah Mizo mipuite min awi leh thei dawn.   

'Ngaihlungrun' hi a hla thupui ang hian a hla a lungrun dawn hle a, hla lungkuai tak, Mizo rilrem zawng tak a ni dawn. Hmana kan hriat ṭhin Rebecca Saimawii kha a la nihzia a rawn pholang leh dawn a ni. 

Kan hre ṭheuh a, Covid-19 hripui a leng a, thil tih a harsa hle. A bikin Karnataka state phei chu hripui kai tam state pangana a ni hial a, chutiang karah chuan Rebecca-i hian recording leh music video a buaipui a ni a, harsatna nasa tak a paltlang ang tih chu a chiang.

"He hla hi May 25-a ka phuah kha a ni a, recording studio ṭha tak tak awm ve bawk mah se 'public trans­port'-a chuan kan hlau si a, chumi a nih avang chuan ke a kal phak leka studio te tak teah chuan recording ka ti a ni. Rap leh hip hop lam record ṭhin an ni a, Mizo hla ang phei chu an khawih thiam lo hle a, ka duhthu pawh a sam lo hle. Roma track rawn siam hmangin aw ka va thun a, mixing ka duhthu a sam lo hle a ni," tia sawiin an an hla record chu a duhthu sam lo hle mah se Mizo mipuite ngaihthlak tur hla hlui leh ngei a duh thu Vanglaini a hrilh.

A tirah chuan lyric video anga tihchhuah an tum a, mahse kum 10 chuang hnua hla tichhuak ve tura lyric video ngawt han tihchhuah kha chu a ui si a, hrileng karah security strict tak karah leh ruahsur hnuaiahte video an shoot a ngai a, chuvang chuan music video hlu ak a ni dawn. "Tlanchhe chung tak meuh meuhin kan shoot a ni," tiin a sawi hial.

Tunah hian hla phuah lamah a insawrbing nasa a, lengzem leh fakna hla hmangin Mizo mipuite min awi chho leh dawn niawm tak a ni, a YouTube channel lamah heng a hla tharte kan ngaithla thuai thei turah beisei ang.

Kan hre ṭheuh a, love song hun eng emaw chen a sak hnuah Gospel lamah a inlet a, tunah lengzem hla nen a rawn comeback leh dawn a, social media lamah pawh zawhna a dawng nasa.

Pi Makuri chuan,"A mihringa hi an pawimawh. Zahawm takin lengzem hla a sak theih a, chutiang bawkin zahawm takin Pathian fakna hla pawh a sak theih a ni," tiin a sawi.