Amitabh Bachchan-te pafain Covid-19 an kai

Bollywood legend Amitabh Bachchan leh a fapa Abhishek Bachchan-te chuan Covid-19 an kai tih hmuhchhuah a ni a, Inrinni zanah khan damdawi-inah an dah lut.

Kum 77 lai ni ve tawh Amitabh Bachchan chuan Twitter-ah a chhungte dang leh a staff member-te swab sample pawh lak a nih thu sawiin result an nghah mek thu a sawi. Hetihlai hian Aishwarya Rai Bachchan leh a fanu Aaradhya Bachchan-te chuan hri an kai tih nimin khan hmuh chhuah a ni tawh a, damdawi-inah an nufa hian an dah lut. Jaya Bachchan erawh chu a test result a negative thung.

Nimin zingah khan an admit-na damdawi-in Nanavati Super Speciality Hospital Public Relation Officer chuan thuchhuah siamin Amitabh chu a dinhmun a ṭha tih leh symptom erawh nasa tak ni lem loin a nei tih a sawi a, an damdawi-in isolation unit-ah an dah tih a sawi bawk.

Amitabh-a'n hripui a kai tih puan a nih hnu lawk hian a fapa Abhishek pawhin Twitter-ah hri a kai ve thu a post a, symptom nasa lo tak a pa ang bawka a neih thu a tarlang tel. Nanavati Hospital doctor chuan Amitabh chu zan dar 10 velah an damdawi-inah a luh thu sawiin a dinhmun a ṭha tih leh a ṭul anga hma an lak char char thu a sawi.

Hripuiin milian leh mi te a thliar hrang lo a, Bollywood veteran actress Rekha pawh a security guard-in Covid-19 a lo kai avangin BMC chuan a bungalow midang tlawh pawh theih loin an khar. Hetihlai hian Anupam Kher nu Dulari leh a unaupa Raju-te pawhin Covid-19 hi an kai ve bawk a, an khung hrang mek a ni.