Miss Mizoram 2017 Grand Finale atan inbuatsaih mek Zaninah Charity Dinner awm dawn

Miss Mizoram 2017 chu Grand Finale atan inbuatsaih chhoh mek a ni a, Grand Finale hi March 10, Zirtawpni zan hian neih a ni ang. Miss Mizoram 2017 hian SHALOM nena ṭangkawpin HIV/AIDS kaite hnenah kum khat chhung nutrition support a pe dawn a, chumi atan chuan zanin hian Charity Dinner buatsaih a ni ang a, tel duh chuan ZONET Office-ah ngaihven theih a ni.

Miss Mizoram 2017 Grand Finale hi Zirtawpni zan dar 8 hian MZU Multipurpose Hall-ah neih a ni ang a, ticket Rs. 300 man leh Rs. 1,000 man te siam a ni. Rs. 1,000 man ticket hi dawhkân kil bial tur buatsaihsak an ni ang. Ticket hi zawrh chhuah tawh a ni a, Zonet Office-ah lei theih reng a ni. Ticket hralhna hi HIV/AIDS te pual cha­rity atana hman vek tur a ni.

Grand Finale-ah hian Cocktail Dress, Traditional Dress leh Evening Gown hmangtein Miss Mizoram contestant mi 16 te hi an inel leh ang.

Judge turte hi Lucy Sailo, Charlie Mathlena, Susan R. Ralte, Edward Lalrempuia leh Miss India Priyadarshini Chatterjee te an ni a, Priyadarshini Chatterjee hi Guest of Honour tur a ni bawk.

SHALOM nena ṭangkawpin Miss Mizoram 2017 hian Charity a buatsaih mek a, zanin hian Cha­rity Dinner a awm ang a, hetah hian Miss India, Priyadarshini Chatterjee pawh a tel dawn a, ani hi chaw eipui tur a ni.

Charity Dinner-ah hian mi 50 chauh tan hmun buatsaih a ni a, entry hi single tan Rs. 3,000 leh couple tan Rs. 5,000 a ni. A duh tan ZONET Office-ah ngaihven theih a ni a, Charity Dinner-a sum hmuh zawng zawngte hi HIV/AIDS veite enkawlna, nutrition support atana hman vek tur a ni.