India ramah khua a lum tial tial

Han tawrh mai pawh hian a hriat deuh roh a, mithiam lamin an sawi ngei hi a rinawm lehzual. India Meteorological Department leh Indian Institute of Tropical Meteorology chuan kum sawm bi zela chhutin, India ramah khua a lum tual tual a, kum 10 kalta nena khaikhin mai pawhin khua a lum tawh hle an ti.

India Meteorological Department leh Indian Institute of Tropical Meteorology-in heat index a tarlanah chuan kum 10 kaltaa nipui aiin tun laia nipui hi 0.56°C-in a lum tawh zawk a, kum 10 kal taa fur lai aiin tunlaia fur hi 0.32°C-in a lum tawh zawk bawk. Heat Index hi khaw lum leh khaw hnâwngin mihringa nghawng a neih dan tehna a ni. Heat Index a sân poh leh mihringin khua a lum kan ti nasain mihring tan hrehawm a ni ṭhin.

Khawpui lian 25 zir a ni a, heng zinga khawpui 17 - Mumbai, Pune, Kolkata leh Ahmedabad te telin, heng khuate hi heat index-ah chuan ‘very hot category’-a awm an ni. Mumbai leh Pune chu fur laiin ‘very hot category’-ah an awm a, hmar lama khawpui lian - Delhi, Amritsar leh khaw dangte chu nipui laiin ‘hot category’-ah awmin, fur lai chuan ‘very hot category’-ah an awm.

‘Very hot catgeory’ te hi hlauh­awm­a ngaih a ni a, khaw lum avang­in hriselna pawhin a tawrh phah thei nia ngaih a ni. Pâwn lama awm rei phei chuan stroke leh exhaustion te pawh thlen theia ngaih a ni. Zirchianna aṭanga a landanin India rama khawpui lian 10 lai mai chu fur laia an khaw boruakte a kum telin a lum tial tial. Heng khawpui lianah te hian mihring an tam a, motor a tam a, in leh thil siamna hmun a tam avangin a lum tial tial nia ngaih a ni.