Ed Sheeran-a ‘Divide’ Khawvel inpumkhatna album!

Hnam hrang leh ṭawng hrang, vun rawng inang lo khawvelah Ed Sheeran-a chuan ‘Divide’ (÷) album a tichhuak a, he album hian khawvel a tipumkhat a, music-ah chuan he zaithiam hi khawvelin a hai lo. Divide album-a hla, YouTube-a a dah te mi tluklehdingawn khat velin an en tawh.

Ed Sheeran-a studio album pathumna ‘÷’ hi March 3 khan Ed Sheeran hian a tichhuak. Album a tihchhuah hma, January thla khan “Castle on the Hill” leh “Shape of You” te a lo tichhuak tawh a ni. Album a tihchhuah hma hauh aṭangin heng hla pahnihte ringawt pawh hi Hit a tling tawh a, Divide album a tihchhuah hnu lawkah he album, deluxe version-a mi hla 14 te chu audio video a tichhuak a, chungte chu YouTube-ah, ni thum chhungin mi tluklehdingawn khatin an en tling nghal der.

Shape of You hla chauh pawh hi Ed Sheeran-a channel-ah entu maktaduai 301 an tling tawh a, Castle on the Hill hla hi entu maktaduai 165 an tling tawh bawk. Heng, a hla mal entu zawng zawng belhkhawm hi tluklehdingawn khat a tling der tawh a ni. Chumi awmzia chu khawvel mipui paruk zela pakhatin Ed Sheeran-a hla eng emaw ber hi a ngaithla tawh tihna tluk a ni.

Hei bakah a hlawhtlinna langsar dang leh chu thla hnih chhungin YouTube-a Ed Sheeran-a channel hi mi maktaduai 3-in an subscribe hman. Divide album-a hla lyric vi­deo-a a dah chhuah tawhtea hla tin hian ni thum chhungin entu maktaduai 3 an nei tling ṭheuh bawk.