Lianzuala'n drums a vua!

Chennaiyin FC forward lar Lallianzuala Chhangte i hria em?  India international hian khelmuala ball han chawh kual vel piah lamah thiam a lo nei reng a, chu chu drums vuak a ni!

Nizan khan Zohnuai, Lungleia ṭhian intelkhawm GANDA chuan an hla 'Ka lawm si a' tih chu YouTube channel Peter Video Production lamah en theih turin an pho chhuak a, hla nalh a tling - he music video-ah hian Lianzuala pawh lang vein khuang pu (drummer) a ni.  

GANDA hi  Guns (war, hatred) And Needles (drugs) Deceived Adventure (happiness) tihna a ni a, anni hian rimawi rem lam hna thawkin Mizoram pum huapa zaithiam hriathlawh Pensy B Lalthangliani leh Engengi te chu nalh takin an zai. Lianzuala chuan, "Pathian zarah tluang takin kan hla hmasa ber kan zo thei a, kan lawm takzet. Mizo mipuite kan music video min lo ensak ṭheuh turin ka sawm a ni," tiin Vanglaini a hrilh.