'Pyar Ke Pal' satu KK a fam ta

"Hum, rahen ya na rahen kal..." hla chuai thei lo sain a thih hma lawk darkarah Nazrul Mancha, Kolkata-a mipui pungkhawm chu a aw mawi tak leh ngaihno bei tak hmangin a la awi! Eng nge a hnu lawkah thleng dawn hre lotu mipui pungkhawm chuan an mobile phone flash light on-in, chung lamah an ban vaiin KK-a'n a 90's hit hla a sak lai chuan an la zawm dual dual a...

Bollywood singer lar Krishnakumar Kunnath, KK tia hriat lar chu Thawhlehni khan Kolkata-ah heart attack vangin kum 53 mi niin a thi. KK hian Nazrul Manch-ah show a nei a, a concert lai chuan a awm a nawm loh vangin Esplanade-a a thlenna hotel lam panpui a nih thu tarlan a ni. Mahse a ziaawm theih loh avangin zan dar 10:30 velah Calcutta Medical Research Institute (CMRI) hmanhmawh taka panpui a ni a, mahse doctor-te chuan damdawi-in thlenpui a nih meuh chuan a thih tawh thu an sawi.

KK thih thu hian rang takin India ram mai ni lo, khawvel a deng chhuak nghal a, Prime Minister Narendra Modi chuan Twitter-ah,"KK tira hriat lar zaithiam chhinchhiahtlak tak mai Krishnakumar Kunnath hun lo taka a kal ta mai hian min tilungngai hle mai. A hlate chuan kum bik thliar loin rilrua awm thil hrang hrang kim takin a phawrh chhuak a ni. A hlate kaltlangin kan hrereng tawh ang. A chhungte leh a fan-te ka tawrhpui takzet a ni. Om Shanti," tiin a uina thu a ziak.

Kolkata-ah hian Thawhṭanni leh Thawhlehni khan show a la nei a, Thawhlehni zan dar 8:30 vel thleng khan Nazrul Mancha auditorium-ah a la perform a ni. A nupui leh a fate pawhin nimin zingah khan Kolkata lam an pan nghal bawk.

Akshay Kumar, Armaan Malik, Rahul Vaidya, Munmun Dutta, Harshdeep Kaur, leh Shekhar Ravjiani-te bakah India milar tam takin an uithu an ziah chhiar tur social media-ah hmuh tur a tam nghal hle.

Pal kha
KK-a'n a larpui ber leh hriat a hlawh zualna album 'Pal' kha April 16, 1999-a a tlangzarh niin hla pariat a awm a, kha album-a hla zawng zawng kha a 'hit' vek a ni. Kha album-a hla lar ber 'Pyar Ke Pal' vang khan Star Screen Award for best singer award-te pawh a dawng hial bawk.

KK-a hla Spotify lama stream nasat zualte:-
1 Ajab Si mtd. 36.9
2 Khuda Jane mtd 34.6
3 Kya Muhje Pyar Hai mtd 28.1
4 Zara Sa mtd 26.4
5 Dil Ibaadat mtd 22.3
6 Dil Kyun Yeh Mera mtd 21.4
7 Tu Jo Mila mtd 17.8
8 Tu Hi Meri Shab Hai mtd 14.1
9 Make Some Noise mtd 12.1