'Hraileng au rawl' hmawr bawk hnai ta

Mizoram State Commission for Protection of Child Rights (MSCPCR) leh Zonet ṭangkawp buatsaih, 'Hraileng au rawl' recitation competition, middle school chin hnuailam zirlaite tana buatsaih top-10 intihsiakna chu zanin hian Zonet Zawlbuk channel leh Zonet Empai Apps ah te Live-a pek chhuah leh a ni dawn.

Top-10 inelna hi zan hnih neih tur a ni a, a zan hnihna Zirtawpni zanah neih tur niin result puan nghal a ni ang.

Top 10 inelna, zan khatnaah hian zirlaite'n Lalnunpuia Hrahsel phuah poem chu inelna atan an hmang ang a, Top 10 zan hnihna, Zirtawpni zanah chuan thupui thlan sa mil, inelna hmasa lama an lo sawi tawh an duh apiang an thlang thei dawn a ni.

'Hraileng au rawl' inelnaah hian thupuiah 'Chhungkaw ṭha, hnam lungphum' tih hman a ni a, khua leh tui ṭha leh mi hmantlaka naupangte an lo ṭhanlen theihna tura Zoramin chhungkaw ṭha a mamawh zia pholanna lam hawi inelna a ni. Naupangten hla chham, poetry hmangin, an nu leh pa, khawtlang leh ram hruaitute laka an beiseinate an auchhuahpui thin a ni.