MDM-in General Assembly vawi 7-na hmang dawn

Music Domain Mizoram (MDM) chuan naktuk, June 3, 2022 hian Dawrpui Multipurpose Centre-ah General Assembly vawi sarihna an hmang dawn a, Million Views award semna an nei nghal bawk ang.

Chawhnu dar 3-5 inkarah General Assembly an nei dawn a, R Lalbiaksanga, President MDM chu chairman tur niin Vanlalpeka, Exe. Committee Member chuan hunserh a hmang ang. He hunah hian One In Christ leh Hlimhlimi te an zai dawn bawk.

Dar 5-6 inkarah inthlanna an neih chhunzawm dawn a, chumi zawhah chuan chawhlui an kilho ang.

Zan lamah award sem leh million views chawimawina hun an hmang dawn a, he hun hi Zonunsangi Fanai kaihhruaina hnuaiah an hmang ang a, K Lalthanzama, Chairman, Joseph Construction chu Khuallian tur a ni ang. Faktu-te chuan fakna hla an hlan anga, ICT Dept. lamin awareness campaign an nei nghal bawk dawn a ni.

MDM-te hian Bakshi Ground, Ukhrul, Manipur-a buatsaih Shirui Lily Festival-a Rock Contest ‘ShiRock 2022’ winner 'The Prophets' band chu lawmpuina hun an hmang dawn bawk.