Miss Mizoram 2017 ; Miss India aizawl a rawn thleng ta
Miss Mizoram 2017 chu zanin dar 8 hian MZU Multipurpose Hall-ah Grand Finale neih a ni dawn ta. Grand Finale-a judge tur leh Guest of Honour tur, Miss India 2016, Priyadarshini Chatterjee chu nimin khan Aizawl a rawn thleng ta.
Priyadarshini Chatterjee hi nimin khan Lengpui airport-ah a rawn ṭum. Ani hi Femina Miss India World 2016-a thlan a ni a, nikuma Miss World thlanah khan India ai a awh a, Top 5-ah a tling hial. North East aṭanga Miss World-a India aiawha inlan hmasa ber a ni. Assam-a Dubhri khaw chhuak a ni a, kum 1996-a piang kha a ni.
Miss Mizoram Grand Finale ticket hi Rs. 300 leh Rs. 1,000 man siam a ni a, Zonet Office-ah lei theih a ni. Ticket hralhna hi Miss Mizoram Charity-ah SHALOM ṭanpui nan hman a ni ang. Grand Finale hi Zonet Zawlbukah dar 8:00 aṭangin a pulunga tihchhuah a ni ang.
Tun ṭumah hian Sub Title 12 a awm dawn a, chung zinga pakhat, People's Choice chu contestant-te thlalak, Facebook leh Instagram-a like hnem aṭanga thlan chhuah tur a ni. Sub Title dangte chu Miss Congeniality, Miss Personality, Best Gown, Miss Beautiful Hair, Beautiful Skin, Beautiful Smile, Miss Talent, Miss Active, Miss Perfest 10, Miss Photogenic leh Miss Catwalk te a ni.