Nicki Minaj-i’n Aretha a tluk ta

February thla tawp lam khan Nicki Minaj-i’n Aretha Franklin a tluk hnai kan ti a, tunah chuan a tluk ta.

Nicki Minaj hla ‘Make love’, Gucci Mane a sakpui chu Billboard Hot 100-a 78-naah a rawn lang thar a, heti hian Billboard Hot 100-a hmeichhe zinga hla lang thei nei hnem ber a ni a, Aretha Franklin a nih rual. Aretha Fran­klin leh Nicki Minaj te hian Billboard Hot 100-a lang thei hla 73 ve ve neiin, he chart-a hla lang pha nei hnem ber hmeichhe zingah an ni. Hetiang dinhmuna ding tur hian Minaj hian kum sarih emaw vel chauh hun a mamawh.

Hot 100-a Nicki Minaj kan hmuh hmasak ber chu Lil Wayne-a hla aṭangin a ni. Lil Wayne-a album-a mi Knockout hla, kum 2000-a tihchhuahah khan Nicki Minaj a zai tel ve a, he hla hi Hot 100-a a lanna hmasa ber a ni. A solo bika Hot 100-a lang hmasa ber chu Your Love kha a ni a, 14-na thleng phain, kum 2010 khan kan hmu.

Minaj hian Taylor Swift aiin Hot 100-a lang thei hla pathumin a ngah zawk. Palinaah Rihanna leh Madonna an awm a, Hot 100-a lang thei hla 58 ve ve an nei. Rihanna hian Future-a hla Selfish a sakpui kha a vanneihpui a ni. Nicki Minaj leh Aretha inan lohna chu Hot 100 chart-a an hla lang thei 78 ve ve zingah, Aretha Franklin hi chu ama solo hla 73-in a lang a, Nicki Minaj erawh Hot 100-a a lanna zinga hla 29-ah hian lead artist a ni.