Lalhlumawii’n ‘Ka Lal i ni si’ a tichhuak

Mizo Idol-a pahnihna lo ni tawh, Hnahthial nula, Bitei tia koh Lalhlumawii chuan kumina a music video hmasa ber a peih a, a ti­chhuak ta. He a music video thar hi ‘Ka lal i ni si’ tih a ni.

Nikum October thlaa album a tihchhuah hnuah Bitei hian music video a buaipui a, a peih a, tunah chuan MDM Library-ah pawh a dah tawh. ‘Ka lal i ni si’ hla hi Mama, Hnahthial phuah a ni a, ani hi ‘Kei kher min thlang si’ tih phuahtu kha a ni. Foster-ah recording an ti a, video hi Milestone Pictures kutchhuak a ni a, music hi Kima Chhangte siam niin, Hmuifang vela an shot a ni.

He hla hi amah Lalhlumawii hian a duh a, a ngaina. “A hla hi a ṭha ka ti a, hla dang ang lo takin a sak pawh nuam ka ti hle,” a ti. Tunlaiah chuan music chart-te a awm tawh avangin chumi beiseia siam video pawh a awm ta nual. Hlumawii chuan, “Ka hrethiam chiah lo, chart-a a lan tur leh tur loh lamah beisei dan ka thiam lo,” a ti. Pathian ṭhatzia fakna lam a ni a, chart-a a lo thleng sang ta a nih leh Pathian ṭhatzia miin an hre hnem ting mai dawn a ni.

‘Ka lal i ni si’ hla hi Bitei album, nikum October-a a tihchhuah ‘Lei leh van siamtu’ tih album-a mi kha a ni. He album-ah hian hla 14 a awm a, chung zinga pariat chu music video a ni. A album-a hla awm zinga pakhat ‘Ka lal i ni si’ chu single-in a tichhuak ta a ni. Lalhlumawii hian hmachhawp hnaivai a nei lem lo a, amaherawhchu music video dang erawh tihchhuah a tum. Kum­inah hian a theih ang tam music video siam a tum a, chutihrualin tunhnaia han bawhzui thut thut tur erawh a nei lo.