Sanjay Dutt lemah Ranbir Kapoor

Bollywood film ngaihsak tak i nih chuan he film hi chu i ngaihven ngei ang. Bollywood-a actor ropui, Sanjay Dutt-a chanchin chu film-a siam mek a ni a, Sanjay Dutt lemah Ranbir Kapoor a chang.

Bollywood media-ten an tarlan dan chuan Ranbir Kapoor hian Sanjay Dutt lema chang tur hian kg 13 zetin a rih belh a, chu mai bakah Bhopal jail-ah chawlhkar khat zet a tâng dawn! Nilaini khan Bhopal-ah a kal nia tarlan a ni a, he khawpuiah hian chawlhkar khat chhung, jail-ah a tâng dawn.

Sanjay Dutt hi kum 1959-a piang a ni a, Bollywood star zinga chanchin ngah pawl tak a ni. Kum 1993 khan Terrorist and Disruptive Activities (Prevention) Act hmanga man a ni a, hemi dan hmanga thubuai an siamsakah thiam a chang a, amaherawhchu phalna nei loa ralthuam kawl avangin thiam loh chantir a ni thung. A film chan zingah Qurbani te, Mission Kashmir te, LOC Kargil te, Mehbooba te chu kan hriat lar ṭhenkhat an ni.

Sanjay Dutt film an siam chhoh mekah hian Sonam Kapoor chu Sanjay Dutt-a ngaihzawng hlui angah a chang a, Vicky Kaushal chu US-a a ṭhian, Anushka Sharma chu journalist lemah a chang. Manisha Koirala pawh a chang bawk. A chanchin film-a an siam mek avang hian Sanjay Dutt hian film chan a chawlhsan ta a ni lo a, film chan tur hmabak pawh a la nei nual.