March 16-ah Fashion Fusion 2017

Kum 2010 aṭangin kum tin buatsaih tawh, Mizorama fashion show changtlung zinga mi Fashion Fusion chu March 16 (Ningani) zan hian Mizoram University Multipurpose Hall-ah buatsaih a ni dawn.

Fashion Fusion hi Vakiria Institute of Fashion Technology (VIFT) in an zirlai kal chhuak turte puala fashiobn show an buatsaih a ni a, kum khat chhunga fashion lama an zirte a taka an pholanna a ni.

Kum dang ang bawkin Mizoram top models ual an inlar leh dawn a, heng model-te hian VIFT-a zialaite kutchhuak thawmhnaw hrang hrang an ha dawn a, entertainment hmuhnawm leh ngaihnawm dang a awm bawk ang.

Computerised Embroidery Institute of Fashion Technology (CEIFT) tih ṭhin kha Vakiria Institute of Fashion Technology (VIFT) tia a hming thlak a ni tawh a, tun batch-ah hian zirlai 29-in an kut chhuak hrang hrang an pholang dawn a ni.

Kuminah hian zirlaite kut chhuak endiktu atan hian designer hrang hrang - Rinsangi (Rags Riches), Mahlui (Pearl) leh Vanlalruata (VeRuata) te sawm an ni.

Kum dangah sawm bikte puala tih ṭhin ni mah se kuminah hian sawm bikte bakah fashion lama tui mite tan hun remchang siam a ni dawn a, ticket Rs 200/- man tlem siam a ni a, hei hi Vakiria, Lalbuaia Shopping Complex-ah lei theih a ni ang.