Johnny Depp leh Amber Heard Court thawnthu a tawp ta ; Defamation case-ah Johnny Depp-a'n thiam a chang
Amber Heard-i'n a pasal hlui Johnny Depp-a'n kut a thlak ṭhin thu kum 2018-a Washington Post lama a sawi vanga an inkara thubuai kal zel chu Nilaini khan a hmawr bawk a ni ta a, Johnny Depp chuan thiam changin a nupui hlui Amber Heard chuan $maktaduai 15 lai a chawi a ngai dawn. Hetihlai hian jury lam chuan Depp-a lawyer hlui Adam Waldman-a'n Daily Mail lama Heard-i thusawi 'intihderna' nia a sawi vangin Depp pawhin $mtd 2 chu a chawi ve a ngai dawn bawk.
Aquaman star Amber Heard hian kum 2018 khan Washington Post lama opinion piece-ah Depp nena an inneih laiin mahni in chhunga tharum thawhna tuartu a nih thu a sawi a, hei hi Depp chuan $mtd 50 lai chawi turin a khing a ni. Chu chu Amber Heard hian $mtd 100 chawi tura khing let ve leh thungin an pahnih inkar boruak hian khawvel ngaihven a hlawh ta hle a ni.
Heard leh Depp inkar thubuai hi kar ruk lai ngaihtuah a ni a, an pahnih mai bakah hriatpuitute hnen aṭanga thusawi hrang hrang ngaihthlak a nih hnuah Nilaini khan an thubuai hmawr chu bawkin an pahnih hian pawisa hi an chawi ve ve a ngai dawn a, chutih lai erawh chuan an inkhinna thubuai berah chuan Johnny Depp chuan thiam a chang thung.
Amber Heard hausak zawng hi Fox Business chuan $mtd 8 vel niin a sawi a, Celebrity Net Worth chuan nimin lamah kha chuan $mtd 8 nei angin a ziak tawh! Johnny Depp erawh chuan $mtd 150 vel a nei angin an ziak thung!
- Johnny Depp leh Amber Heard hi kum 2011 khan 'The Rum Dairy' film an channa aṭangin an intawng.
- February 2015 khan inneiin kum hnih hnuah an inṭhen leh.
- Amber Heard chuan December 2018 khan Washington Post-a opinion piece-ah mahni inchhunga tharum thawhna tuartu a nih thu a sawi a, Johnny Depp hming erawh a sawi lang tel lo.
- Depp-a lawyer chuan Heard chu Depp chungchang a sawi ngei niin a sawi thung.
- Kum hnih dawn liam taah khan The Sun chanchinbu-in Depp chu 'Nupui vuak ching' tia a ziah avanga thubuaiah London-ah libel case-ah Depp-a'n thiam loh a chang.
- London High Court judge chuan Depp chu Heard kut a thlak ṭhin thu a sawi zui.
- Depp-a lawyer chuan Washington Post print-na hmun Fairfax County, Virginia, US-ah thubuai a thehlut leh a ni.
"He case-a ka chak lo hi hrehawm ka ti hle. Chu aia min tihrehawmtu zawk chu American ka nih anga dikna chanvo ka neih- zalen tak leh inhawng taka ka duh ka sawi theihna ka hloh nia ka hriatna hi a ni"
- Amber Heard
"Kum ruk liam taah khan ka nun, ka fate nun leh ka bulhnaia awmte nun mai bakah mi tam tak, min ringa min thlawptute nun chu kumkhua atan tihdanglamin a awm. Chu pawh chu mit khap kar lekin.... Kum ruk a liam leh a, jury chuan ka nun min pe kir leh a. Ka lawm takzet a ni." - Johnny Depp
