'Hraileng au rawl' Grand finale zaninah

Mizoram State Commission for Protection of Child Rights (MSCPCR) leh Zonet ṭangkawp buatsaih, 'Hraileng au rawl' recitation competition, middle school chin hnuailam zirlaite tana buatsaih chu zaninah a hmawr bawk a ni dawn a, zirlaite zinga hla chham thiam berin lawmman tangkafai Rs. 50,000 leh thuziak a dawng ang.

Top-10 intihsiak zan khatna, nizan khan zirlaite hi Lalnunpuia Hrahsel phuah, 'Hnam Lungphum' tih hmangin an inel a, zirlaite an thiam tlangin Judge pathum, Dr H Laldinmawia, Dr Ramdinliani leh Dr Lalropuia-te lu pawh an tihai hle. Nizan inelnaah khan uaptu Women and Child Development changtu Minister Dr. K Beichua-a'n thuchah a sawi a ni.

Zanin Grand Finale-ah hian zirlaite hian Round hmasa lama an lo chham tawh poetry zinga an duh ber sawiin inelna an hmachhawn leh ang a, result puan nghal a ni ang a. Dar 8:00 aṭanga ṭan tur Grand Finale hi Zonet Zawlbuk channel leh YouTube-ah te Live-a pek chhuah a ni ang.

'Hraileng au rawl' prize turte chu:-

Pakhatna Rs.50,000/-

Pahnihna Rs.30,000/-

Pathumna Rs.20,000/-

Tiṭha zual dang pasarih hnenah Consolation Prize pek a ni dawn bawk.