Miss Mizoram 2017 Rody H. Vanlalhriatpuii Mipuite inlungrualna ber

Miss Mizoram 2017 chu Zirtawpni zan khan MZU Multipurpose Hall-ah Grand Finale neih a nia, Rody H. Vanlal­hriatpuii, Lawngtlai nula chu Miss Mizoram atan thlan a ni.

Miss India, Priyadarshini Chatterjee uapna hnuaiah Grand Finale hi neih a ni a, Miss Mizoram 2017 hi Priyadarshini hian lallukhum a khumtir.

Top 10 aṭangin Top 5-ah tla thlain, a tawpah Miss Mizoram 2017 result hi puan a ni.

Top 10-ah hian C. Vanlal­hlupuii, Lalrinchhuangi, Sharon Vanlalhruaii, Lal­malsawmi, K. Zirtluangi, Rody H. Vanlalhriatpuii, Catherine Lallawmsangi, Lalbiakhlui, V. Vanlalnunpuii leh Esther Vanlalnunpuii Sailo te an tling.

Top 5-ah Esther Vanlalnunpuii Sailo, Rody H. Vanlalhriatpuii, Lalmalsawmi, Catherine Lallawmsangi leh Sharon Vanlalhruaii te an tling.

Result puan a ni a, Rody H. Vanlalhriatpuii, Lawngtlai nula chu Miss Mizoram 2017 a ni a, Rody hi mipui duhthlan People’s Choice dawngtu a ni bawk. Ani hi Miss Talent-a thlan a nih bakah Best Gown a la bawk. Runners Up hi Zemabawk North nula Esther Vanlalnunpuii Sailo a ni a, Sub-Title-ah Miss Beautiful Smile a dawng. Lalmalsawmi, Lunglei Salem Veng chu 2nd Runners Up-a puan a ni.

Miss Mizoram hian tangka faiin Rs. 110,000 a dawng a, hei bakah hian a thlawna Bangkok zin theih­na te, a thlawn bawk­a Rajasthan zin theihna te a dawng tel. Hei bakah hian CK Cars authorised dealer Paggio, Bawngkawn aṭangin Vespa S 125cc Scooter a dawng a, Longi Industries Ambassador nihna pek a ni. Vivo C5 phone te, Mitashi Semi Automa­tic Washing Machine a dawng a, thla ruk chhung atan Magnis Health Club Mem­ber nihna pek a ni bawk.

1st Runners Up Esther Vanlalnunpuii Sailo hian Rs. 50,000 bakah, Vivo smartphone a dawng a, 2nd Runners Up Lalmalsawmi hian Rs. 30,000 leh Viva smartphone a dawng. An pahnih hian thla thum chhung ve ve Magnus Health Club member nihna pek an ni.

Miss Mizoram 2017 Grand Finale-ah hian Subtitle 12 lai sem a ni.

Rody H. Vanlalhriatpuii
Pian hun : Dec. 26, 1993
Nu leh pa : H. Thangchianga leh C. Lalhuzami
Unau zat : Mipa 3 leh hmeichhia 4
Zirna lam : Kum 2016 khan Mizoram University aṭangin Master of Social Work a zo
A dang : Kum 2011 aṭang khan modelling lamah a lut a, hemi kum hian Govt. Zirtiri Residential Science College ‘Miss’-a thlan a ni.
Kum 2015 khan IIT Guwahati-a Alchering Festival-ah Mizoram University Team-a telin, Best Female Model-a thlan a ni