Hanson-in kum 25 tlin lawm nan tour dawn

Mizoram mipuite MTV zûna kan uai chhoh laia naupang unau rawn lar a, ‘MMMBop’ nena min rawn nuaitu, Hanson khan kum 25 an tling ta a, kum 25 an tlin lawmna pualin nakkum khian tour neih an tum.

Hanson hi kum 1992-a Tulsa, Oklahoma-a unau, Zac, Taylor leh Isaac Hanson tena an din a ni. Kum 25 tlin lawm nana khawvel hmun hrang hranga concert an neih tur hi tunhnai khan an puang chhuak a, an tour hming tur hi The Middle of Everywhere 25th Anniversary World Tour a ni a, an khua, Tulsa, Oklahoma aṭangin tour bul hi May thla hian an ṭan ang.

Hanson hi kum 1992 khan Tulsa-a Mayfest Arts Festival aṭangin professional line hi an zawh tak tak ṭan a, hetihlai hian Hanson Brothers tiin an invuah a, kum 1993 khan Hanson tiin an hming hi an titawi ta a ni. Kum 1995 khan Boomerang album an tichhuak a, kum 1996 khan MMMBop album an ti­chhuak leh bawk. MMMBop album hi Mi­zote thleng pawhin kan hriat lar hla awmna a ni. Hemi hnu hian album pasarih an tichhuak tawh a, an album tihchhuah hnuhnun ber chu kum 2013-a mi Anthem kha a ni.

An lar laia naupang leh rawlthar mai ni kha tunah chuan an puitling hle tawh. Zachary ‘Zac’ Hanson hi kum 31 a ni tawh a, Taylor Hanson kha kum 34 a tling tawh a, an upa ber Isaac Hanson kha kum 36 a ni a, November thla hian kum 37 a tling ang.