Rody-i an hmuak ropui ; HIV/AIDS doa theihtawp chhuah a tum ; Damdawi in 3-ah ṭanpuina tur sum a pe

Nimin khan Miss Mizoram 2017 Rody H. Vanlalhriatpuii chuan an khua Lawngtlai a lut a, Lawngtlai khaw mipui­ten ropui takin an lo lawm.

Rody hi lirthei nen mi ṭhahnem takin Lawng­tlai khaw dai aṭangin an hmuak ṭan a, Lawngtlai Areopagi-ah a lawmna neih a ni. Rody-i hmuahnaah hian zaithiamte zai­tir an ni a, Lawngtlaia pawl hrang hrangten lawmpuina thil chi hrang hrang an pe.

Lawngtlaia an hmuahna prog­ramme-ah hian Rody chuan thusawiin, Lawngtlai mipuite hnenah a dinhmun a sang ta thut a ni lo tia sawiin, “In fanu, in farnu, in laizawn ka la ni reng a ni,” a ti. Mizoram leh Mizo ṭhalaite tan theihtawp a chhuah dawn tih a sawi a, “Ṭum khatah thil tam tak ka ti thei lo; thil pakhatah inthlurbing ka tum a, chu chu HIV/AIDS-ah a ni,” a ti.

Mizoramah HIV hrik pai kan tam tawh thu te, inring lo tak tak pawhin an kai thute sawiin, “Fihlim anga lang, fihlim ni si lo an tam,” a ti a, HIV hrik paite chu endawng mai tur an nih lohzia sawiin, “An dinhmun kan hriatthiampui a, kan ṭanpui an mamawh a ni,” a ti.

Lawngtlai mipuite chu thisen test tura choin, nun danin a zir loh vang kher ni lo pawha lo kai theih a nihzia a hrilh a, mahni inhriatchian a pawimawh a ni a ti. A thusawi ngaithlatute chu AIDS kai lo tura ṭan la turin a sawm a, nun uluk turin a ngen. HIV/AIDS doa hma lakpui turin a sawm. Nun fimkhur lote tan he natna hi kai a awlsam bik tih sawiin, “Kan nun kan fimkhur thei lo a nih pawhin condom tal i hmang ang u,” a ti.

Rody hian nimin hian Lawngtlaia damdawi in pathum - Christian Hospital Lawngtlai, Lairam Christian Medical Centre leh Lawngtlai District Hospital-te a tlawh nghal a, heng damdawi inte hnenah Poor Fund atan Rs. 2,000 ṭheuh a hlan.

Hei bakah hian Lairam Motherless Home, College Veng, Lawngtlai chu tlawh bawkin, Rs. 2,000 a hlan bawk. Lairam Christian Medical Centre-a naupang damlo, Zomuani, kum 8 chuan amah hmuh a chak thu a sawi a, Rody hian Rs. 500-in a kan nghal.