Fashion Fusion zaninah

Mizorama fashion show changtlung berte zinga mi, Fa­shion Fusion chu zanin dar 7:30 hian MZU Multipurpose Hall-ah buatsaih a ni leh dawn a, hetah hian Vakiria Institute of Fashion Technology (VIFT)-a zirlaite collection chu model-ten an ha chhuak ang.

Fashion Fusion hi VIFT-in an zirlai kal chhuak turte puala fashion show an buatsaih a ni a, kum khat chhunga fashion lama an zirte a taka an pholanna a ni.

VIFT hian kumin hian zirlai 29 an nei a, an zingah hian mipa pathum an awm. Heng zirlaite hian collection pali zel an phochhuak ang a, an collection-te hi Mizo model ṭha ṭhiau 16 ten an hak chhuahsak ang.

Zirlaite hnenah lawmman hrang hrang an siam an pe ang. Best Collection, Best Craft Endorsement, Most Creative, Best Garment Construction, Queen/King of Fashion Fusion leh Most Commercially Viable te siam a ni.

Fashion Fusion atan entry ticket siam a ni a, Rs. 200 man niin, Vakiria dawr, Lalbuai Shopping Complex-ah zawrh chhuah a ni a, Fashion Fusion neihna hmun tur, MZU Multipurpose Hall kawt­ah lei tur dah chhuah a ni bawk ang.

Fashion Fusion hi kum 2010 aṭang­in kum tin buatsaih a ni a, tun ṭumah hian Rinsangi (Rags Riches), Mahlui (Pearl) leh Vanlalruata (VeRuata) te chu judge tur an ni.